బిహార్ లఖిసరాయ్కి చెందిన ఓ వ్యక్తి ఒక్కసారిగా కోటీశ్వరుడయ్యాడు. వందలు కాదు.. లక్షలు కాదు.. ఏకంగా వేల కోట్ల రూపాయలు బ్యాంకు ఖాతాలో జమా అయ్యాయి. బ్యాంకు ఖాతా తనిఖీ చేసుకోగానే విషయం ఈ బయటపడింది.
జిల్లాలోని బర్హియా గ్రామానికి చెందిన సుమన్ కుమార్కు.. కోటక్ సెక్యూరిటీస్ మహీంద్రా బ్యాంకులో డీమాట్ ఖాతా ఉంది. అతడు స్టాక్ మార్కెట్లో ట్రేడింగ్ చేస్తుంటాడు. వారం రోజుల క్రితం అతడి బ్యాంకు ఖాతాలోకి రూ.6,833.42 కోట్లు వచ్చి చేరాయి. ఇటీవల ఖాతా తనిఖీ చేసుకున్న సుమన్కు విషయం తెలిసింది. అకౌంట్లో వేల కోట్ల రూపాయలు చూసి సంభ్రమాశ్చర్యాలకు గురయ్యాడు సుమన్. అయితే, డబ్బులు ఎలా వచ్చాయో తెలియడం లేదు. ఇప్పటికీ డబ్బులు ఖాతాలోనే ఉన్నాయి.
"సుమన్.. ఇంట్లో నుంచే స్టాక్ మార్కెట్కు సంబంధించిన ట్రేడింగ్ వర్క్ చేస్తాడు. ఈ క్రమంలోనే ఖాతాలో భారీగా నగదు జమా కావడాన్ని గమనించాడు. దీని గురించి తెలుసుకునేందుకు చాలా మందిని సంప్రదించాడు. తొలుత సాంకేతిక తప్పిదం అని భావించాం. కానీ, కస్టమర్ కేర్కు కాల్ చేస్తే.. నిజంగానే డబ్బులు క్రెడిట్ అయినట్లు స్పష్టమైంది. సమాచార హక్కు కింద వివరాలు కోరాం. కానీ ఇప్పటివరకు ఎలాంటి సమాచారం అందలేదు."
-శ్రావణ్ కుమార్, సుమన్ కుటుంబ సభ్యుడు
దీనిపై తమకు పూర్తి సమాచారం అందలేదని సూర్యగఢ స్టేషన్ హౌస్ అధికారి చందన్ కుమార్ వెల్లడించారు. 'పట్నా నుంచి మాకు ఒకరు కాల్ చేసి ఈ విషయం గురించి చెప్పారు. కానీ, అధికారికంగా మాకు ఎలాంటి సమాచారం అందలేదు. బ్యాంకు అధికారులు ఈ విషయంపై మమ్మల్ని సంప్రదిస్తే ఏమైనా చెప్పగలం' అని వివరించారు. దీంతో ప్రస్తుతం వేల కోట్ల రూపాయలు ఖాతాలోనే ఉన్నాయి. పొరపాటున నగదు బదిలీ అయిందనుకున్నా.. దీనిపై ఇంతవరకు ఎవరూ పోలీసులను సంప్రదించకపోవడం ఆశ్చర్యం కలిగిస్తోంది.
