Spurious liquor Bihar: బిహార్లో మరోమారు కల్తీ మద్యం కలకలం సృష్టించింది. లిక్కర్ బ్యాన్ నేపథ్యంలో పోలీసులు కఠిన చర్యలు తీసుకుంటున్నా కల్తీ మద్యం విక్రయాలు ఆగటం లేదు. ఆ మద్యం సేవించి అమాయకులు బలవుతున్నారు. బిహార్లోని భాగల్పుర్, బాంకా, మధేపురా జిల్లాల్లో తాజాగా మరో 19 మంది అనుమానస్పద రీతిలో మృతి చెందారు. కల్తీ మద్యం కారణంగానే ప్రాణాలు కోల్పోయారని కుటుంబ సభ్యులు, స్థానికులు ఆరోపించారు. కేసు నమోదు చేసుకున్న పోలీసులు దర్యాప్తు చేపట్టారు.
భాగల్పుర్, బంకా జిల్లాల్లో..
భాగల్పుర్ జిల్లాలోని యూనివర్సిటీ పోలీస్ స్టేషన్ పరిధిలో నలుగురు అనుమానాస్పదంగా మృతి చెందారు. దీనికి కల్తీ మద్యమే కారణమని స్థానికులు ఆరోపించారు. పోస్ట్మార్టం తర్వాత అసలు కారణం తెలుస్తుందని పోలీసులు స్పష్టం చేశారు. కల్తీ మద్యం తయారీపై దాడులు చేస్తున్నట్లు చెప్పారు. జిల్లాలోని నారాయణ్పుర్ పోలీస్ స్టేషన్ పరిధిలోని గ్రామాల్లో మరో నలుగురు మృతి చెందినట్లు అధికారులు తెలిపారు. మొత్తంగా భాగల్పుర్ జిల్లాలో 8 మంది మృతి చెందారు.
బాంకా జిల్లాలో గత నాలుగైదు రోజుల్లో ఎనిమిది మంది మరణించారు. అయితే, కల్తీ మద్యం మరణాలుగా జిల్లా యంత్రాంగం ఎలాంటి ప్రకటన చేయలేదు.
ఎల్జేపీ లీడర్ సహా ముగ్గురు..
మెధేపురా జిల్లా, ముర్లిగంజ్ పోలీస్ స్టేషన్ పరిధిలోని డిగ్గి గ్రామంలో కల్తీ మద్యం తాగి లోక్ జనశక్తి పార్టీ బ్లాక్ అధ్యక్షుడు సహా మొత్తం ముగ్గురు ప్రాణాలు కోల్పోయారు. పలువురు ప్రజలు అస్వస్థతకు గురై ఆసుపత్రిలో చికిత్స పొందుతున్నారు. అయితే, స్థానిక యంత్రాంగం ఎలాంటి ప్రకటన చేయలేదు. గత గురువారం గ్రామంలో మందు పార్టీ జరిగింది. ఆ మరుసటి రోజున పార్టీలో పాల్గొన్నవారు అస్వస్థతకు గురయ్యారు. అందులో ముగ్గురు మృతి చెందారు. మృతులు.. పురాకి సింగ్(32), ఎల్జేపీ బ్లాక్ అధ్యక్షుడు నీరజ్ నిశాంత్ సింగ్ బావూ, సంజీవ్ కుమార్ రమణి(25)గా గుర్తించారు.
3 లక్షలకుపైగా కేసులు..
రాష్ట్రంలో మద్య నిషేధాన్ని 2016లో అమలు చేసింది బిహార్ ప్రభుత్వం. మద్యం తయారీ, విక్రయం, సేవించటం నేరం. తొలినాళ్లలో నేరానికి పాల్పడితే ఆస్తుల స్వాధీనం, జీవిత ఖైదు శిక్షలు ఖరారు చేశారు. అయితే, 2018లో లిక్కర్ బ్యాన్ చట్టానికి సవరణలు చేశారు. శిక్షల్లో ఉపశమనం కల్పించారు. 2016 నుంచి ఇప్పటి వరకు 3లక్షలకుపైగా నిబంధనల ఉల్లంఘన కేసులు నమోదైనట్లు పోలీసులు తెలిపారు.
ఇదీ చూడండి: మద్యానికి డబ్బులివ్వలేదని కన్నతల్లిని కడతేర్చిన కుమారుడు
