పుస్తక ప్రేమికుల కోసం ఏదైనా చేయాలని ఆలోచించిన బంగాల్ ప్రజా రవాణా శాఖ ఓ వినూత్న ఆలోచనతో ముందుకొచ్చింది. అందరూ చదువుకునేలా ఓ ప్రత్యేకమైన గ్రంథాలయం ఏర్పాటు చేసింది. లైబ్రరీ ఏర్పాటు చేయడంలో ప్రత్యేకత ఏముంది అని అనుకుంటే మీరు పొరబడినట్లే. ఈ గ్రంథాలయం మామూలుగా ఓ స్థలాన్ని ఎంచుకుని ఏర్పాటు చేసింది కాదు. ప్రత్యేకమైన బోటులో దీన్ని ఏర్పాటు చేయడం విశేషం.
విభిన్న పుస్తకాలున్న ఈ ఫ్లోటింగ్ లైబ్రరీలో సాహిత్యానికి సంబంధించిన వివిధ కార్యక్రమాలు చేపట్టేందుకు సన్నాహాలు చేస్తున్నామని డబ్ల్యూబీటీసీ యాజమాన్యం పేర్కొంది. జనవరి 28 నుంచి ఈ గ్రంథాలయం అందుబాటులోకి వచ్చినట్లు తెలిపింది.
"ఇక్కడ అనేక రకాల పుస్తకాలున్నాయి. కేవలం పిల్లల కోసమే దీన్ని ఏర్పాటు చేయలేదు. పెద్దవాళ్లు కూడా ఇందులో పుస్తకాలు చదవొచ్చు. చదవాలనే ఆసక్తి ఉన్నవారెవరైనా ఈ లైబ్రరీలోకి ఆహ్వానితులే. వాళ్లు చిన్నారులైతే ఏంటి? పెద్దవాళ్లయితే ఏంటి?. ఈ బోటులో చదువుకునేందుకు పెద్దలకు రూ. 100, చిన్నారులకు రూ. 50 ఛార్జి తీసుకుంటున్నాం".
- స్వర్ణకమల్ సాహా, డబ్ల్యూబీటీసీ డిప్యూటీ ఛైర్మన్.
ప్రస్తుతం ఈ బోటు లైబ్రరీలో 500 పుస్తకాలున్నాయి. రానున్న రోజుల్లో మరో 500 పుస్తకాలు ఏర్పాటు చేసేందుకు రవాణా శాఖ యాజమాన్యం సన్నాహాలు చేస్తోంది. హూగ్లీ నది ప్రవాహాన్ని ఆనందిస్తూ, ప్రకృతి అందాలను తిలకిస్తూ పర్యటకులు పుస్తకాలు చదువుకోవచ్చని డబ్ల్యూబీటీసీ తెలిపింది. అపీజయ్ ఆనంద్ చిల్డ్రన్స్ లైబ్రరీతో కలిసి ఈ ఫ్లోటింగ్ లైబ్రరీని ఏర్పాటు చేసినట్లు పేర్కొంది. ఈ 'కోల్కతా యంగ్ రీడర్స్ బోట్ లైబ్రరీ' ఏర్పాటుపై స్థానికులు, పిల్లలు హర్షం వ్యక్తం చేస్తున్నారు.
"కరోనా నేపథ్యంలో పార్కులు, లైబ్రరీలు మూసివేశారు. ఈ తరుణంలో పిల్లలకు చదువుకునేందుకు మంచి ప్రదేశం ఎక్కడా లేదు. నచ్చిన పుస్తకాలు చదువేందుకు ఈ బోట్ లైబ్రరీ ఒక మంచి అవకాశాన్ని కల్పిస్తోంది. ఇక్కడికి మళ్లీ రావాలని ఆశిస్తున్నాను. కానీ, పాఠశాలలు ఇతర పనుల దృష్ట్యా ఇక్కడికి తరుచుగా రాలేకపోవచ్చు."
- రితోజా దాస్, చిన్నారి.
ప్రత్యేకంగా ఏర్పాటు చేసిన ఈ బోట్ లైబ్రరీని సోమవారం నుంచి శుక్రవారం వరకే తెరవనున్నట్లు ప్రజా రవాణా శాఖ తెలిపింది. రోజులో మూడు ట్రిప్స్ మాత్రమే ఉంటాయని వివరించింది. ఉచిత వైఫై ఏర్పాటు చేసినట్లు పేర్కొంది. ప్రస్తుతం పాఠకులకు ఏదైనా పుస్తకం నచ్చితే అది కొనుక్కునే సదుపాయం ఇందులో లేదని స్పష్టం చేసింది.
ఇదీ చదవండి:యూపీలో కిసాన్ మహాపంచాయత్- వేల మంది హాజరు
