తమిళనాడు రాజధాని చెన్నైలో షాకింగ్ ఘటన వెలుగులోకి వచ్చింది. ఈరోడ్లోని చెన్నిమలై హిల్స్లో ఉన్న జీటీఎల్ ఇన్ఫ్రాస్ట్రక్చర్ అనే ప్రైవేట్ సంస్థకు చెందిన ఓ సెల్ టవర్ పోయిందని పోలీసు స్టేషన్లో కేసు నమోదైంది. ఆ టవర్ 2017 నుంచి ఉపయోగంలో లేదు. దానిపై ఎలాంటి పర్యవేక్షణ లేదు. ఈ అపహరణ కారణంగా సంస్థకు రూ.32 లక్షల నష్టం వచ్చినట్లు తెలుస్తోంది. అయితే ఈ కేసు దర్యాప్తు చేపట్టిన పోలీసులు.. షాకింగ్ విషయాలు వెలుగులోకి తెచ్చారు. ఆ సంస్థకు చెందిన మొత్తం 600 సెల్ టవర్లు అపహరణకు గురైనట్లు గుర్తించారు.
ముంబయికి చెందిన జీటీఎల్ సంస్థ.. కేవలం తమిళనాడులోనే 6 వేలకుపైగా సెల్ టవర్లను ఏర్పాటు చేసి నిర్వహిస్తోంది. అయితే 2018లో నెట్వర్కింగ్ సేవలనూ అందించే ఓ ప్రైవేటు షిప్పింగ్ సంస్థ.. ఆ సేవలను నిలిపివేసింది. దీంతో దేశవ్యాప్తంగా ఆ సంస్థ కోసం ఏర్పాటు చేసిన సెల్ టవర్లు పనిచేయడం ఆగిపోయింది. కరోనా సమయంలో వాటి నిర్వహణ, పర్యవేక్షణ జరగలేదు.
కరోనా కాలాన్ని వినియోగించుకొని, పర్యవేక్షణ కొరవడిన తమ సెల్టవర్లను ఒక గ్యాంగ్ లక్ష్యంగా చేసుకొని అపహరిస్తోందని జీటీఎల్ ఆరోపిస్తోంది. "ఒక సెల్ టవర్ ఏర్పాటు చేయడానికి రూ.25లక్షల నుంచి రూ.40 లక్షలు ఖర్చవుతుంది. మా సంస్థకు చెందిన ఒక ఉద్యోగి, కొందరు దుండగులు కలిసి ఈ దొంగతనాలకు పాల్పడుతున్నారు" అని జీటీఎల్ సంస్థ ఆరోపించింది.
ఇదీ చూడండి: Viral Video: 11వేల వోల్టుల కరెంటు తీగ తాకి వ్యక్తి సజీవదహనం
