'ఎన్నికల్లో ఓటమిని గ్రహించి.. ఇప్పుడే దారిలోకి వస్తున్నారు'

సాగు చట్టాలను రద్దు చేస్తూ ప్రధాని నరేంద్ర మోదీ చేసిన ప్రకటనపై స్పందించారు కాంగ్రెస్​ ప్రధాన కార్యదర్శి ప్రియాంకా గాంధీ వాద్రా. రానున్న ఎన్నికల్లో ఓటమిని గ్రహించి.. మోదీ దేశ వాస్తవిక పరిస్థితులను ఇప్పుడిప్పుడే అర్థం చేసుకుంటున్నారని అన్నారు.

రానున్న అసెంబ్లీ ఎన్నికల్లో ఓడిపోతారని అర్థమయ్యే.. సాగు చట్టాలను రద్దు చేస్తూ నిర్ణయం తీసుకున్నారని విమర్శించారు కాంగ్రెస్ ప్రధాన కార్యదర్శి ప్రియాంక గాంధీ. రైతులు లేకుంటే దేశం లేదనే వాస్తవిక పరిస్థితులు ప్రధాని నరేంద్ర మోదీకి ఇప్పుడు అర్థమవుతున్నాయని అన్నారు.

ఎంతమంది రైతులు అమరులైనా పట్టించుకోలేదని మోదీ ప్రభుత్వంపై ప్రియాంక మండిపడ్డారు. భాజపా నేతలు రైతులను.. ఉగ్రవాదులు, గూండాలు, దుండగులు అని సంబోధించారని అన్నారు.

''600 మంది రైతులు అమరులయ్యారు. 350 రోజులకుపైగా రైతులు పోరాటం చేశారు. వారిని కర్రలతో కొట్టారు. అరెస్టులు చేశారు. మీ మంత్రి తనయుడు.. రైతులను చంపారు. కానీ .. మీరు ఏనాడూ లెక్క చేయలేదు. ఇప్పుడు మారుతున్న మీ వైఖరి, ఉద్దేశాలు అర్థం చేసుకోవడం కష్టం.''

- ప్రియాంకా గాంధీ వాద్రా, కాంగ్రెస్​ ప్రధాన కార్యదర్శి

రైతులే నిజమైన దేశ రక్షకులు అన్న ప్రియాంక.. వారి ప్రయోజనాలను తుంగలో తొక్కి ఏ ప్రభుత్వమూ దేశాన్ని సక్రమంగా నడపలేదని వ్యాఖ్యానించారు.

రైతుల విజయం..

కేంద్ర ప్రభుత్వ అహంకారంపై.. రైతు గెలిచాడని కాంగ్రెస్​ పేర్కొంది. ప్రభుత్వం బలవంతంగానైనా సాగు చట్టాలను రద్దు చేస్తుందని.. గతంలో తాను చెప్పిందే నిజమైందని ట్వీట్​ చేశారు కాంగ్రెస్​ నేత రాహుల్​ గాంధీ. అప్పుడు మాట్లాడిన వీడియోను కూడా షేర్​ చేశారు.

''దేశ అన్నదాతలు తమ సత్యాగ్రహంతో అహంకారాన్ని తలదించేలా చేశారు. అన్యాయంపై సాధించిన ఈ విజయానికి రైతులందరికీ అభినందనలు''

- రాహుల్​ గాంధీ, కాంగ్రెస్​ నేత

సాగు చట్టాలకు వ్యతిరేకంగా రైతులు ఏడాది నుంచి నిరసనలు చేస్తుండగా.. శుక్రవారం జాతిని ఉద్దేశించి ప్రసంగించిన ప్రధాని వాటిని రద్దు చేస్తున్నట్లు ప్రకటించారు.

'అన్నదాతలు గెలిచారు...'

కేంద్ర ప్రభుత్వం అవలంబిస్తున్న నియంతృత్వ పాలన, నేతల అహకారంపై రైతులు విజయం సాధించారని కాంగ్రెస్​ అధ్యక్షురాలు సోనియా గాంధీ వ్యాఖ్యానించారు.

"న్యాయపోరాటంలో 700మంది రైతుల త్యాగాలు ఈ రోజున ఫలించాయి. ఈరోజున.. అహింస, న్యాయం, సత్యం గెలిచాయి. రైతులపై కుట్ర పన్నిన అధికారపక్షంలోని వారు ఈరోజు ఓడిపోయారు. నియంతృత్వ పాలకుల అహకారం ఓడిపోయింది. వ్యవసాయం, జీవనోపాధిపై జరిగిన కుట్ర విఫలమైంది. ఈరోజున.. అన్నదాతలు గెలుపొందారు. ప్రజాస్వామ్యంలో విపక్షం, సంబంధిత వ్యక్తులతో చర్చించిన తర్వాతే నిర్ణయాలు తీసుకోవాలి. ఈ వ్యవహారంతో మోదీ ప్రభుత్వం ఈ విషయాన్ని నేర్చుకునే ఉంటుందని అశిస్తున్నా."

-- సోనియా గాంధీ, కాంగ్రెస్​ అధ్యక్షురాలు.

ఇవీ చూడండి: Farm laws India: సాగు చట్టాల రద్దు.. వ్యూహాత్మకమా? వెనక్కి తగ్గడమా?