మహారాష్ట్రలో బుధవారం రాత్రి 8 గంటల నుంచి మరిన్ని ఆంక్షలు అమలులోకి వస్తాయని ఆ రాష్ట్ర సీఎం ఉద్ధవ్ ఠాక్రే వెల్లడించారు. రాష్ట్రవ్యాప్తంగా 144 సెక్షన్ విధిస్తున్నట్లు స్పష్టం చేశారు. ఏప్రిల్ 14 నుంచి 15 రోజుల పాటు 144 సెక్షన్ అమలులో ఉంటుందని వివరించారు. దీన్ని లాక్డౌన్గా పేర్కొనని చెప్పారు.
కరోనా కారణంగా వైద్య వ్యవస్థపై తీవ్ర ఒత్తిడి నెలకొందని ఉద్ధవ్ పేర్కొన్నారు. ఆక్సిజన్, పడకల కొరత తీవ్రంగా ఉందని చెప్పారు. రెమిడెసివిర్ ఔషధానికి డిమాండ్ పెరిగిందన్నారు. పొరుగు రాష్ట్రాల నుంచి ఆక్సిజన్ను తీసుకొచ్చేందుకు వాయుసేన సహకారం కావాలని ప్రధానిని కోరనున్నట్లు చెప్పారు.
రాష్ట్రంలో పూర్తిస్థాయి లాక్డౌన్ ఉంటుందని ఇటీవల అనేక ఊహాగానాలు వచ్చాయి. మంగళవారం రాత్రి ప్రజలనుద్దేశించి ఉద్ధవ్ చేసే ప్రసంగంలో ఈ ప్రకటనే ఉంటుందని భావించారు. అయితే మహా సీఎం మాత్రం లాక్డౌన్ కాకుండా కఠిన ఆంక్షలవైపే మొగ్గు చూపారు.
