'పవన్ కల్యాణ్, రామ్​చరణ్ నా అచీవ్​మెంట్స్- నేను సాధించింది అదే'- మెగాస్టార్

ఆప్త ఈవెంట్​లో పాల్గొన్న మెగాస్టార్- ఇంట్రెస్టింగ్ విషయాలు షేర్ చేసుకున్న చిరు

Chiranjeevi Speech At APTA : అమెరికన్‌ ప్రోగ్రెసివ్‌ తెలుగు అసోసియేషన్‌ (APTA) ఆధ్వర్యంలో హైటెక్స్‌లో ఆదివారం నిర్వహించిన 'క్యాటలిస్ట్‌ గ్లోబల్‌ బిజినెస్‌ కాన్ఫరెన్స్‌- 2025'కు మెగాస్టార్ చిరంజీవి ముఖ్య అతిథిగా హాజరయ్యారు. ఆయన ఫొటోలు పట్టుకుని అవకాశాల కోసం ఏ సినిమా ఆఫీస్​ చుట్టూ తిరగలేదని చిరంజీవి అన్నారు.

నటనా శిక్షణ పూర్తికాకముందే ఆయనకు ఛాన్స్‌లు వచ్చినట్లు పేర్కొన్నారు. అలాగే ఇదే వేదికపై ఆయన పలు విషయాలు షేర్ చేసుకున్నారు. గతంలో మెగాస్టార్ కుటుంబాన్ని సౌత్ఇండస్ట్రీ 'కపూర్ ఫ్యామిలీ' అంటూ ఓ వార్తా పత్రిక ప్రస్తావించిన సందర్భాన్ని గుర్తుచేసుకున్నారు.

సౌత్ఇండియన్ రాజ్ కపూర్
'ఇప్పటిదాకా మీ అందరికీ నా విజయాల గురించి చాలా చెప్పాను. నా అచీవ్​మెంట్ పవన్​ కల్యాణ్ , నా అచీవ్​మెంట్ రామ్​చరణ్​, మా కుటుంబంలో అందరూ నా అచీవ్​మెంట్సే. వాళ్లను చూస్తుంటే 'ఇది కదా నేను సాధించింది' అనిపిస్తుంది. మొన్న పవన్ కల్యాణ్ ఇంటికి వచ్చినప్పుడు ఒక మాట అన్నాడు. 'అన్నయ్య నువ్వు ఓ మాట అనేవాడివి గుర్తుందా? మన ఇంట్లో ఇంతమంది ఉన్నందుకు, ఇది నాతో ఆగిపోకూడదు. ఓ రాజ్ కపూర్ ఫ్యామిలీలో ఎంత మంది ఉన్నారో, అలాగే మరో రాజ్ కపూర్ ఫ్యామిలీగా మన మెగా కుటుంబం కావాలి అని నువ్వు చెప్పావు. ఈరోజు నీ మాట మంత్రంగా పనిచేసి మన ఫ్యామిలీలో ఇంతమంది ఉన్నాం. అది నీ మాట పవర్' అని కల్యాణ్ బాబు గుర్తు చేశాడు'

'ఇదే విషయాన్ని ఓ పత్రిక కపూర్ ఫ్యామిలీ ఆఫ్ సౌత్ అని ప్రస్తావించినప్పుడు, ఇది మా గొప్పతనం కాదు. ఆ భగవంతుడు, ఈ ప్రజలు, నా అభిమానులు, ప్రేక్షకులు మమ్మల్ని ఆదరించారు. అందుకే ఈ స్థాయిలో ఉన్నాం' అని చిరు అన్నారు.

'ఈ వాతావరణం ఎంతో ఉత్సాహాన్ని ఇస్తోంది. మిమ్మల్ని చూస్తుంటే 'ఆప్త' సభ్యులు కాదు నా ఆప్తులు అనిపిస్తోంది. కొన్ని సమావేశాలకు మొక్కుబడిగా వెళ్తాం. కానీ, ఇలాంటి చోటకి వచ్చినప్పుడు నా కుటుంబ సభ్యులతో ఉన్న ఫీలింగ్‌ కలుగుతుంది. మీరంతా నా ఫ్యామిలీ మెంబర్స్‌' అని సభను ఉద్దేశించి మెగాస్టార్ పేర్కొన్నారు.