షాంఘై కోఆపరేషన్ ఆర్గనైజేషన్ (ఎస్సీఓ) 20వ శిఖరాగ్ర సదస్సులో భాగంగా చైనా, పాకిస్థాన్లకు గట్టి హెచ్చరికలు పంపారు ప్రధానమంత్రి నరేంద్ర మోదీ. ఒకరికొకరు సార్వభౌమత్వాన్ని, ప్రాదేశిక సమగ్రతను గౌరవించుకోవాలని సూచించారు. పాకిస్థాన్ పలు సమావేశాల్లో జమ్ముకశ్మీర్ అంశాన్ని లేవనెత్తటాన్ని సూచిస్తూ.. ఎస్సీఓ కూటమి సూత్రాలను ఉల్లంఘిస్తూ అనవసరంగా ద్వైపాక్షిక అంశాలను లేవనెత్తే ప్రయత్నాలు చేయటం సరికాదని పరోక్షంగా విమర్శలు చేశారు.
"దేశాల మధ్య సంబంధాల బలోపేతానికి, ఒకరికొకరు సార్వభౌమత్వం, ప్రాదేశిక సమగ్రతను గౌరవించే ప్రధాన సూత్రాన్ని అనుసరించటం ద్వారా ముందుకు సాగటం చాలా ముఖ్యమని భారత్ విశ్వసిస్తుంది. ఎస్సీఓ చార్టర్లో పేర్కొన్న సూత్రాలకు భారత్ ఎల్లప్పుడూ కట్టుబడి ఉంటుంది. కానీ, ఎస్సీఓ ముందుకు అనవసరంగా ద్వైపాక్షిక అంశాలను పదే పదే తీసుకొచ్చే ప్రయత్నాలు దురదృష్టకరం. అవి ఎస్సీఓ స్ఫూర్తిని ఉల్లంఘించటమే. శాంతి, భద్రత, సుసంపన్నతలను భారత్ గట్టిగా నమ్ముతుంది. ఉగ్రవాదం, అక్రమ ఆయుధాల రవాణా, డ్రగ్స్, మనీలాండరింగ్లకు మేము వ్యతిరేకం."
- నరేంద్ర మోదీ, ప్రధానమంత్రి.
తూర్పు లద్దాఖ్లో చైనాతో సరిహద్దు సమస్య, చైనా చేపడుతోన్న బెల్ట్, రోడ్ కనెక్టివిటీ ప్రాజెక్టులు సహా సరహద్దు తీవ్రవాదాన్ని పాకిస్థాన్ ప్రోత్సహిస్తున్న క్రమంలో మోదీ ఈ మేరకు వ్యాఖ్యానించారు. ఈ సదస్సులో చైనా అధ్యక్షుడు షీ జిన్పింగ్, పాక్ ప్రధాని ఇమ్రాన్ ఖాన్, రష్యా అధ్యక్షుడు వ్లాదిమిర్ పుతిన్లు సహా ఇతరు అగ్ర నేతలు హాజరైన క్రమంలోనే మోదీ ఈ వ్యాఖ్యలు చేయడం ప్రాధాన్యం సంతరించుకుంది. భారత్-చైనా మధ్య సరిహద్దు సమస్య తలెత్తిన తర్వాత మోదీ, జిన్పింగ్లు నేరుగా ఎదురుపడటం ఇదే తొలిసారి.
ఏకపక్ష చర్యలకు వ్యతిరేకం: ఇమ్రాన్
ఐక్యరాజ్య సమితి భద్రతా మండలి తీర్మానాలను ఉల్లంఘిస్తూ వివాదాస్పద ప్రాంతాల స్థితిని మార్చడానికి ఏ దేశమైనా తీసుకునే చట్టవిరుద్ధమైన, ఏకపక్ష చర్యలకు తాము వ్యతిరేకమని పేర్కొన్నారు పాకిస్థాన్ ప్రధానమంత్రి ఇమ్రాన్ ఖాన్. ఎస్సీఓ సమావేశంలో వర్చువల్గా పాల్గొన్న ఆయన.. ఏళ్లతరబడి కొనసాగుతున్న సమస్యల పరిష్కారానికి ఐరాస తీర్మానాలను అమలు చేయాలని, దేశాల మధ్య స్థిరత్వం, ప్రశాంత వాతావరణాన్ని నెలకొల్పాలని సూచించారు.
ఇదీ చూడండి: కొవిడ్ వ్యాక్సిన్పై రాజకీయం చేస్తే ఊరుకోం: పుతిన్
