Robbery In Railway Station: తమిళనాడు చెన్నైలోని తిరువాన్మియూర్ రైల్వే స్టేషన్లో దొంగతనం జరిగింది. రైల్వే కౌంటర్లోని ఓ ఉద్యోగిని కట్టేసి దుండగులు సుమారు రూ.1.32 లక్షలను దోచుకెళ్లారు. రద్దీగా ఉండే ఈ రైల్వే స్టేషన్లో జరిగిన ఈ ఘటనతో నగర ప్రజలు ఒక్కసారిగా ఉలిక్కిపడ్డారు.
ఇదీ జరిగింది..
తిరువాన్మియూర్ నుంచి ఇతర ప్రాంతాలకు వెళ్లేందుకు సోమవారం ఉదయమే కొందరు ప్రయాణికులు స్టేషన్కు వచ్చారు. వారు టికెట్ కోసం లైన్లో నిలుచున్నారు. ఎంతసేపటికీ టికెట్ ఇచ్చే సిబ్బంది కనిపించలేదు. అదే సమయంలో స్టాఫ్ రూం నుంచి బిగ్గరగా అరిచిన శబ్దం వినిపించింది. అది విన్ని ప్రయాణికులు షాక్‌కు గురయ్యారు. లోపలికి వెళ్లి చూడగా టికెట్ ఇచ్చే ఉద్యోగి చేతులు, కాళ్లను ఎవరో గుర్తు తెలియనివారు కట్టి పడేశారు. అది చూసిన వారు అతనికి ప్రథమ చికిత్సను అందజేశారు. అనంతరం పోలీసులకు సమాచారం ఇచ్చారు.
ఉద్యోగి చెప్పిన దాని ప్రకారం దొంగలు ఆ వ్యక్తిని కట్టేసి రూ.1.32 లక్షలు దోచుకెళ్లారు. దీనిపై కేసు నమోదు చేసిన పోలీసులు దర్యాప్తు చేస్తున్నారు. రైల్వే స్టేషన్ సమీపంలో ఉండే షాపుల్లో సీసీటీవీ ఫుటేజీలను కూడా పరిశీలిస్తున్నారు. రైల్వేస్టేషన్‌లో సీసీ కెమెరాలు లేకపోవడం కారణంగా దుండగులు ఈ సాహసం చేసి ఉండొచ్చని అధికారులు చెబుతున్నారు.
ఇప్పటికే చెన్నైలోని నుంగంబాక్కం రైల్వే స్టేషన్లో స్వాతి అనే సాఫ్ట్‌వేర్ ప్రోగ్రామర్ 2016 జూన్ 24న దారుణ హత్యకు గురైంది. ఈ ఘటన జరిగేటప్పుడు కూడా ఆ రైల్వే స్టేషన్లో సీసీ కెమెరాలు లేవు. దీంతో నిందితుడి ఆచూకీ తెలుసుకోవడం కష్టమైందని అధికారులు గుర్తు చేశారు.
ఇదీ చూడండి: ప్రియుడితో కలిసి అత్తమామలను చంపి.. దోపిడీ డ్రామా ఆడిన కోడలు!
