బంగాల్ శాసనసభ సభ్యత్వానికి చేసిన రాజీనామాకు స్పీకర్ ఆమోదం తెలిపినట్లు ప్రకటించారు సువేందు అధికారి. తన రాజీనామాపై చర్చించేందుకు ఇవాళ అసెంబ్లీ స్పీకర్ బీమన్ బెనర్జీని కలిసిన నేపథ్యంలో ఆమోదం లభించినట్లు తెలిపారు.
" ఎమ్మెల్యే పదవికి రాజీనామాపై వివరణ ఇచ్చేందుకు తనను కలవాలని అసెంబ్లీ స్పీకర్ ఆదేశించారు. ఈరోజు ఆయన్ను కలిశాను. రాజీనామా లేఖ స్వచ్ఛందంగా, సొంతంగానే అందించారా? అని అడిగారు. నేను అవునని చెప్పాను. ఈ క్రమంలో నా రాజీనామా అంగీకరించినట్లు చెప్పారు."
- సువేందు అధికారి, భాజపా నేత
బంగాల్ అధికార తృణమూల్ కాంగ్రెస్ పార్టీకి, ఇతర పదవులతో పాటు ఎమ్మెల్యే పదవికీ రాజీనామా చేసి.. ఇటీవలే భాజపాలో చేరారు సువేందు. అయితే.. సువేందు రాజీనామా పత్రంలో తేదీ స్పష్టంగా పేర్కొనలేదని కొద్దిరోజుల క్రితం తెలిపారు బంగాల్ అసెంబ్లీ స్పీకర్ బీమన్ బెనర్జీ. రాజీనామాను సువేందు స్వయంగా సమర్పించలేదని.. ఈ కారణంగా అది నిజమైనదని, స్వచ్ఛందంగా చేశారని నిర్ధరించడం కష్టమని పేర్కొన్నారు.
టీఎంసీలోకి భాజపా ఎంపీ భార్య..
బంగాల్లో ఇటీవల టీఎంసీ నుంచి భాజపాలోకి భారీగా వలసలు పెరిగాయి. ఈ తరుణంలో ఆ రాష్ట్ర భాజపా ఎంపీ సౌమిత్ర ఖాన్ భార్య సుజాత మండల్ ఖాన్.. కాషాయ నేతలను ఆశ్చర్యానికి గురిచేస్తూ టీఎంసీలో చేరారు. 2019 లోక్సభ ఎన్నికల్లో తన భర్త విజయం కోసం ఎంతో కష్టపడ్డప్పటికీ ఎలాంటి గుర్తింపు లేదని.. అందుకే పార్టీ మారుతున్నట్లు చెప్పారు సుజాత మండల్. "పార్టీకి నమ్మకంగా ఉన్నవారిని వెనక్కి నెట్టి ఇటీవలే కాషాయ పార్టీలో చేరిన అవినీతి నాయకులకే అధిక ప్రాధాన్యమిస్తున్నారు" అని ఆరోపించారు.
ఇదీ చూడండి: వచ్చే ఎన్నికల్లో భాజపాదే అధికారం: సువేందు
