వివాదాస్పద 'దిల్లీ' బిల్లుపై నేడు రాజ్యసభలో చర్చ జరగనుంది. రోజు కంటే ఒక గంట ముందే ఇవాళ ఎగువ సభ సమావేశాలు ప్రారంభమవుతాయని పార్లమెంటరీ వ్యవహారాల మంత్రి ప్రహ్లాద్ జోషీ తెలిపారు. జీరో అవర్, ప్రశ్నోత్తరాల సమయం, భోజన విరామం ఉండదని స్పష్టం చేశారు. ఉదయం 9.30 గంటలకు రాజ్యసభ బిజినెస్ అడ్వైజరీ కమిటీ(బీఏసీ) సమావేశం జరుగుతుందని తెలిపారు.
ఈ బిల్లుకు వ్యతిరేకంగా ప్రతిపక్షాల నినాదాల నడుమ మంగళవారం.. రాజ్యసభ పలుమార్లు వాయిదా పడింది.
లోక్సభలో ఆమోదం..
విపక్షాల నుంచి తీవ్ర వ్యతిరేకత వ్యక్తమైనప్పటికీ.. ఈ 'గవర్నమెంట్ ఆఫ్ నేషనల్ క్యాపిటల్ టెర్రిటరీ ఆఫ్ దిల్లీ(జీఎన్సీటీడీ)-సవరణ బిల్లు' లోక్సభలో ఆమోదం పొందింది. దేశ రాజధానిపై కేంద్రానికి ఎక్కువ అధికారాలు ఇచ్చేలా ఈ బిల్లును రూపొందించారు.
దీని ప్రకారం దిల్లీ ప్రభుత్వమంటే.. లెఫ్టినెంట్‌ గవర్నర్‌ అని, కార్యనిర్వహణకు సంబంధించి దిల్లీ ప్రభుత్వం తప్పనిసరిగా ఆయన అభిప్రాయం తీసుకోవాలని పొందుపరిచారు.
విపక్షాల విమర్శలు..
దిల్లీ ప్రభుత్వం నుంచి అధికారాన్ని లాక్కునేందుకు ఈ బిల్లును తీసుకువచ్చారని ఆమ్ ఆద్మీ పార్టీ ఆరోపించింది. ఈ బిల్లు రాజ్యాంగ విరుద్ధ చర్య అని కాంగ్రెస్ విమర్శించింది. ప్రజల చేత ఎన్నికైన ప్రభుత్వాల ప్రజాస్వామ్య హక్కులను ఈ బిల్లు కాలరాస్తుందని అన్నారు రాజ్యసభలో కాంగ్రెస్ పక్షనేత మల్లికార్జున ఖర్గే.
ప్రతిపక్ష పార్టీలైన కాంగ్రెస్, రాష్ట్రీయ జనతా దళ్, సమాజ్వాదీ పార్టీ, నేషనలిస్ట్ కాంగ్రెస్ పార్టీ, శివసేన, డీఎంకే.. రాజ్యసభలో ఎన్సీటీ సవరణ బిల్లును వ్యతిరేకిస్తున్నాయని అన్నారు ఆప్ ఎంపీ సంజయ్ సింగ్.
ఇదీ చూడండి: వివాదాస్పద 'దిల్లీ' బిల్లుకు లోక్సభ ఆమోదం
