రైల్​రోకో: రంగంలోకి 20 వేల రైల్వే బలగాలు

సంయుక్త కిసాన్​ మోర్చా.. సాగు చట్టాలను రద్దు చేయాలంటూ రైల్​రోకోకు పిలుపునిచ్చిన నేపథ్యంలో భారీగా బలగాలను రంగంలోకి దించేందుకు సిద్ధం అవుతోంది రైల్వేశాఖ. సుమారు 20 వేల మందిని దేశవ్యాప్తంగా మోహరించేందుకు నిర్ణయించినట్లు రైల్వే ప్రొటెక్షన్ ఫోర్స్ డైరెక్టర్ జనరల్ అరుణ్​కుమార్​ తెలిపారు.

సాగు చట్టాలకు వ్యతిరేకంగా రైతు సంఘాల నేతలు రైల్​రోకోకి పిలుపునిచ్చిన నేపథ్యంలో భారతీయ రైల్వేకు చెందిన 'రైల్వే ప్రోటెక్షన్​ స్పెషల్​ ఫోర్సు'ను రంగంలోకి దించనుంది. ఈ మేరకు 20 కంపెనీల అదనపు బలగాలను దేశవ్యాప్తంగా మోహరించేందుకు నిర్ణయం తీసుకుంది. ముఖ్యంగా పంజాబ్​, ఉత్తర్​ప్రదేశ్​, హరియాణాల్లో రైతులు పెద్ద ఎత్తున నిరసనలు చేపట్టనున్న కారణంగా ఆ రాష్ట్రాలపై ప్రత్యేక దృష్టి సారించనుంది.

వ్యవసాయ చట్టాలను రద్దు చేసే దిశగా కేంద్రంపై ఒత్తిడి తెచ్చేందుకు సంయుక్త కిసాన్​ మోర్చా(ఎస్​కేఎం) దేశవ్యాప్తంగా రైల్​రోకోకు పిలుపునిచ్చింది. దేశవ్యాప్తంగా గురువారం మధ్యాహ్నం 12 గంటల నుంచి 4 గంటల వరకు రైళ్ల దిగ్బంధం కొనసాగుతుందని తెలిపింది.

"శాంతిభద్రతలను కాపాడాలని ప్రతి ఒక్కరికీ విజ్ఞప్తి చేస్తున్నాను. సంబంధిత జిల్లా అధికార యంత్రాంగంతో పర్యవేక్షిస్తున్నాం. ఇందుకుగాను స్థానికంగా కంట్రోల్​ రూంలు ఏర్పాటు చేశాం. ఇప్పటికే ఇంటెలిజెన్స్ నుంచి సమాచారం సేకరించాం. పంజాబ్, హరియాణా, ఉత్తర్​ప్రదేశ్, బంగాల్ రాష్ట్రాల్లోని కొన్ని ప్రాంతాలపై ప్రత్యేక దృష్టి పెట్టాం. ఇందుకుగానూ సుమారు 20 వేల మందిని రంగంలోకి దించాం."

-అరుణ్ కుమార్, రైల్వే ప్రొటెక్షన్ ఫోర్స్ డైరెక్టర్ జనరల్

రైలు ప్రయాణీకులకు ఎటువంటి ఇబ్బంది కలగకుండా చూడటమే తమ ప్రధాన ఉద్దేశ్యమన్నారు అరుణ్​ కుమార్​. రైలు రోకో చేపట్టే ఆ నాలుగు గంటల వ్యవధిలో ఎటువంటి ఆవాంఛనీయ సంఘటనలు జరగకుండా చూడాలన్నారు