Haridwar hate speech: ఉత్తరాఖండ్ హరిద్వార్లో ఇటీవల జరిగిన ధర్మ సంసద్లో జితేంద్ర నారాయణ్ త్యాగి విద్వేష ప్రసంగం చేశారు. ఓ వర్గాన్ని రెచ్చగొట్టేలా తీవ్ర వ్యాఖ్యలు చేశారు. పోలీసులు ఇందుకు సంబంధించి ఆయనపై కేసు నమోదు చేశారు. ఐపీసీ సెక్షన్ 153ఏ కింద జితేంద్రపై ఎఫ్ఐఆర్ నమోదు చేసినట్లు కోత్వాలి పోలీస్ స్టేషన్ ఎస్హెచ్ఓ రకీందర్ సింగ్ తెలిపారు. సమాజంలో వర్గాలు, కులాలు, భాష, ప్రాంతాల మధ్య చిచ్చు పెట్టేలా ప్రవర్తిస్తే ఈ సెక్షన్ కింద అభియోగాలు మోపుతామన్నారు.
జితేంద్ర త్యాగి ఇటీవలే తన మతం మార్చుకున్నారు. వసీం రిజ్వీ పేరు తీసి త్యాగిగా మారారు.
హరిద్వార్ జ్వాలాపుర్ ప్రాంతానికి చెందిన గోఖలే చేసిన ఫిర్యాదు మేరకు పోలీసులు ఈ కేసు నమోదు చేశారు. ఈ ఫిర్యాదు ప్రతులను అతను ట్విట్టర్లో షేర్ చేశాడు. డిసెంబర్ 27లోగా ధర్మ సంసద్ నిర్వాహకులను అరెస్టు చేయాలని డిమాండ్ చేశారు. ఓ వర్గాన్ని లక్ష్యంగా చేసుకుని ఈ విద్వేష ప్రసంగం తీవ్రంగా ఉందని తెలిపాడు.
ఈ కార్యక్రమంలో పాల్గొన్న వారందరూ కొన్ని వర్గాల వారిపై దాడులు చేయాలని రెచ్చగొట్టేలా ప్రసంగాలు చేసినట్లు తెలుస్తోంది. ఇందుకు సంబంధించిన వీడియోలు సామాజిక మాధ్యమాల్లో వైరల్గా మారాయి. పోలీసులు మాత్రం తమ వద్ద ఎలాంటి వీడియోలు లేవని చెప్పారు.
Dharma Sansad hate speech
ఈ ధర్మసంసద్ను డిసెంబర్ 17నుంచి 20 మధ్య జునా అఖండకు చెందిన యాతి నరసింహానంద్ గిరి ఏర్పాటు చేసినట్లు సమాచారం. ఓ వర్గంపై హింసకు పాల్పడాలని గతంలో చేసిన విద్వేష ప్రసంగాల వల్ల పోలీసులు ఆయనపై ఇప్పటికే నిఘా వహిస్తున్నారు.
ఈ సమావేశంలో ఓ వర్గంవారిపై దాడి చేయాలని, ఆయుధాలతో అందుకు సిద్ధం కావాలని, మాజీ ప్రధానిని చంపాలని పలువురు ప్రసంగించారు.
Rahul gandhi hate speech
రాహుల్ ఫైర్..
ధర్మ సంసద్లో విద్వేష ప్రసంగంపై కాంగ్రెస్ అగ్రనేత రాహుల్ గాంధీ మండిపడ్డారు. హిందుత్వవాదులే ఇలాంటి విద్వేష ప్రసంగాలు చేసి సమాజంలోని వర్గాల మధ్య చిచ్చుపెట్టాలని చూస్తారని ధ్వజమెత్తారు. దాని వల్ల అందరూ మూల్యం చెల్లించుకోవాల్సి వస్తుందని ట్వీట్ చేశారు. భారత్ హిందుత్వవాదానికి, హింసకు వ్యతిరేకమని.. ఇలాంటివి జరగవని పేర్కొన్నారు. ఇలాంటి వ్యాఖ్యలను చేసే వారిని ఉపేక్షించవద్దన్నారు.
Haridwar Dharma Sansad
ప్రియాంక డిమాండ్...
విద్వేషం, హింసను వ్యాప్తి చేయాలని చూసే వారిపై కఠిన చర్యలు తీసుకోవాలని కాంగ్రెస్ ప్రధాన కార్యదర్శి ప్రియాంక గాంధీ వాద్రా డిమాండ్ చేశారు. మాజీ ప్రధాని సహా ఇతర వర్గాల వారిపై దాడి చేయాలని ప్రచారం చేసే వారిని వదిలిపెట్టొద్దని ట్వీట్ చేశారు.
ఇదీ చదవండి: ప్రజలకు కేంద్రం హెచ్చరిక- అనేక రాష్ట్రాల్లో నైట్ కర్ఫ్యూ
