'పేదలను విస్మరించి.. బడా కార్పొరేట్లకే మోదీ సాయం'

ప్రధాని మోదీపై తీవ్ర విమర్శలు చేశారు కాంగ్రెస్​ నేత రాహుల్​ గాంధీ. పేదలను విస్మరించి బడా కార్పొరేట్లకు మాత్రమే సాయపడుతున్నారని ఆరోపించారు. ఆర్థిక వ్యవస్థ మెరుగుపడాలంటే పేదలకు నేరుగా డబ్బు పంపిణీ చేయడమే మార్గమని అభిప్రాయపడ్డారు.

లక్షలాది మంది పేద ప్రజలకు సాధికారత కల్పించకుండా.. పెద్ద వ్యాపారవేత్తలకు మాత్రమే ప్రధాని మోదీ సాయం చేస్తున్నారని ఆరోపించారు కాంగ్రెస్​ నేత రాహుల్ గాంధీ. వ్యాపారవేత్తల చేతిలో డబ్బు పెడితే ఆర్థిక వ్యవస్థ మెరుగవుతుందని ప్రధాని భావిస్తున్నారని.. కానీ వారు ఆ డబ్బు తీసుకుని పరారవుతున్నారని ఎద్దేవా చేశారు. వయనాడ్​లో గురువారం నిర్వహించిన ప్రచారంలో భాగంగా ఈ వ్యాఖ్యలు చేశారు. కేరళలో అధికారంలోకి వస్తే.. న్యాయ్ పథకాన్ని అమలు చేస్తామన్నారు.

"కేరళ ఆర్థిక వ్యవస్థ వృద్ధి చెందడానికి న్యాయ్​ పథకాన్ని ప్రతిపాదిస్తున్నాం. ఈ పథకం ద్వారా కేరళలో ఉన్న పేదల బ్యాంకు ఖాతాల్లో ప్రతినెల రూ.6000 డిపాజిట్​ చేస్తాం. పేదలకు డబ్బు పంపిణీ చేస్తేనే ఆర్థిక వ్యవస్థ మెరుగవుతుందని నేను భావిస్తాను. ఈ ప్రాంతం ఒక్కప్పుడు సుగంధ ద్రవ్యాలకు పెట్టింది పేరు. ఇప్పుడు కూడా మనం ఆ స్థాయిని చేరుకోవచ్చు. కానీ ఇవన్నీ సాధ్యం కావాలంటే రాష్ట్రంలో మేం అధికారంలోకి రావడం ఒక్కటే మార్గం."

-రాహుల్​ గాంధీ, కాంగ్రెస్​ నేత

లెఫ్ట్​ పార్టీలతో..

కేరళలో ఉన్న సమస్యలపై తాను లెఫ్ట్​ పార్టీలతో చర్చించేందుకు సిద్ధమని స్పష్టం చేశారు రాహుల్. ఇరు పక్షాల సిద్ధాంతాలు భిన్నంగా ఉన్నా ఈ సమయంలో చర్చలు జరపడం ముఖ్యమని వ్యాఖ్యానించారు.

ఇదీ చదవండి : వాజే కేసు: హోటల్​లో ఎన్​ఐఏ తనిఖీలు