సరిహద్దు దేశాలతో ఉద్రిక్తతలు నెలకొన్న తరుణంలో గగనతల రక్షణ వ్యవస్థను మరింత పటిష్ఠం చేసేందుకు భారత రక్షణ పరిశోధన, అభివృద్ధి సంస్థ(డీఆర్డీఓ) దృష్టి సారించింది. ఇందులో భాగంగా డీఆర్డీఓ మంగళవారం ప్రయోగించిన 'క్యూఆర్-సామ్' క్షిపణి పరీక్ష విజయవంతమైంది. నిర్దేశిత లక్ష్యాన్ని కచ్చితత్వంతో ఛేదించినట్లు సంస్థ ప్రకటించింది.
ఉపరితలం నుంచి గగనతలంలోకి ప్రయోగించే ఈ క్షిపణి 25 నుంచి 30 కిలోమీటర్ల పరిధిలోని లక్ష్యాలపై దాడి చేస్తుంది. శత్రుదేశ యుద్ధవిమానాల రాడార్ల జామింగ్‌కు వ్యతిరేకంగా ఎలక్ట్రానిక్ కౌంటర్ చర్యలతో ఇది పోరాడుతుంది. ఈనెల 13నే దీని సామర్థ్యాలను డీఆర్డీఓ విజయవంతంగా పరీక్షించినప్పటికీ ఇవాల్టి పరీక్షలో క్షిపణిలోని వార్‌హెడ్ల పనితీరును పరీక్షించింది. క్యూఆర్ సామ్ పరీక్షలు విజయవంతం కావడం పట్ల రక్షణమంత్రి రాజ్‌నాథ్ సింగ్ డీఆర్డీఓ శాస్త్రవేత్తలను అభినందించారు.
