కరోనా నిర్ధరణ పరీక్షల కోసం చేసే ఆర్టీపీసీఆర్ టెస్టింగ్లో ఫలితాల కోసం సుమారు 48 గంటలు వేచి చూడాల్సిన పరిస్థితి నెలకొంది. దీన్ని అధిగమించేందుకు ఆర్టీపీసీఆర్ కంటే వేగంగా, కచ్చితమైన ఫలితాలనిచ్చే 'డ్రై స్వాబ్ టెస్ట్'ను అందుబాటులోకి తెచ్చారు మహారాష్ట్ర నాగ్పుర్లోని 'నేషనల్ ఎన్విరాన్మెంటల్ ఇంజినీరింగ్ రీసెర్చ్ ఇన్స్టిట్యూట్(నీరి)' పరిశోధకులు. ఈ పరీక్షల్లో కేవలం 3 గంటల్లోనే కచ్చితమైన ఫలితాలు వెలువడుతాయని చెబుతున్నారు.
54వేల పరీక్షలు విజయవంతం..
నాగ్పుర్లో ఇటీవల.. కరోనా కేసులు గణనీయంగా పెరుగుతున్నాయి. అందువల్ల పరీక్షల సంఖ్యా పెంచాల్సి వచ్చింది. అయితే.. ఆర్టీపీసీఆర్లో ఫలితాలు ఆలస్యమవుతున్నందున.. వైరస్ కేసులు మరింత అధికమయ్యే ప్రమాదం ఉంది. ఈ పరిస్థితిని అధిగమించేందుకు విస్తృత పరిశోధనలు చేశారు 'నీరి' శాస్త్రవేత్తలు. 'డ్రై స్వాబ్ పరీక్ష'ల్లో ఇప్పటివరకు 54వేల టెస్టింగ్లను విజయవంతంగా చేపట్టినట్టు అధికారులు తెలిపారు. వీటి నిర్వహణకు ఖర్చుకూడా తక్కువగానే ఉంటుందన్నారు.
ఆర్టీపీసీఆర్ తరహాలోనే..
ఆర్టీపీసీఆర్ తరహాలోనే డ్రై స్వాబ్ టెస్టింగ్లోనూ నమూనాను తీసుకుంటారు. దాన్ని 4 డిగ్రీ సెంటిగ్రేడ్ ఉష్ణోగ్రత వద్ద ఉంచి పరీక్షిస్తారు. ఈ ట్యూబ్ ద్వారా కొవిడ్ సంకోచించే అవకాశం దాదాపుగా ఉండదని పరిశోధకులు అన్నారు. ఈ పద్ధతి ప్రస్తుతం.. 'నీరి' ప్రయోగశాలలో మాత్రమే ఉపయోగిస్తున్నామని.. త్వరలోనే 40 పరిశోధనా కేంద్రాలకు చెందిన ప్రయోగశాల నిపుణులకు విస్తరిస్తామని చెప్పారు.
ఇదీ చదవండి: కరోనా రోగిని తరలించినందుకు రూ.1.2లక్షలు డిమాండ్!
