హిమాచల్ ప్రదేశ్లోని హిమాలయ పర్వత శ్రేణుల్లో.. అత్యంత అరుదుగా కనిపించే బ్లూ షీప్(నీలి గొర్రెలు) సంచరిస్తున్నట్లు గుర్తించారు అటవీ అధికారులు. భడల్ అని కూడా పిలిచే వీటి పాదముద్రలను.. కుల్లూలోని గ్రేట్ హిమాలయన్ నేషనల్ పార్కు అధికారులు 5 వేల అడుగుల ఎత్తులో కనిపెట్టారు. ఈ గుర్తుల ఆధారంగా బ్లూ షీప్ ఉనికిపై అధ్యయనం చేస్తున్నారు.
హిమాలయాల్లోని అత్యంత ఎగువ ప్రాంతాలకు వెళ్లిన 10 మంది సభ్యుల అటవీ బృందానికి.. బ్లూ షీప్ పాదముద్రలు, పేడ కనిపించాయి. ఏ మాత్రం ఆలస్యం చేయకుండా వాటిపై పరిశోధనలు జరిపారు. ఇప్పుడు వాటి జాడను కనిపెట్టే పనిలో పడ్డారు. ప్రస్తుతం అక్కడ భారీగా మంచు పేరుకుపోయిందని, హిమం తొలగించిన వెంటనే వీటి ఆధారాలను కనిపెడతామని అంటున్నారు అటవీ అధికారి సుమిత్ భరద్వాజ్. గతంలో ఇక్కడి జాతీయ పార్కులోనూ అడపాదడపా నీలి గొర్రెలు కనిపించేవని ఆయన చెబుతున్నారు.
అంతరించే దశలో..
బ్లూ షీప్ ఎక్కువగా వేటగాళ్ల ఉచ్చులో చిక్కుకొని ప్రస్తుతం కనుమరుగయ్యే ప్రమాదంలో ఉన్నాయి.
ఇవి ఎక్కువగా మంగోలియా నుంచి చైనా వరకు హిమాలయాల్లోనే తిరుగుతుంటాయి. అయితే వీటిని బ్లూ షీప్ అని పిలిచినా.. రంగు మాత్రం నీలం లేదా గొర్రెల వర్ణాన్ని పోలి ఉండవు. లేత గోధుమ రంగులో మేకలను తలపించే ఈ జంతువులు.. గడ్డి, ఆకులు తింటూ జీవిస్తాయి. సుమారుగా 60-70 కేజీల బరువుంటాయి.
ఇదీ చూడండి: 'గడ్డం' ఛాంపియన్కు అవార్డులు దాసోహం
