- బంగాల్లో భాజపా రెండంకెలు దాటడం గగనమే.
- 99 కంటే ఒక్క స్థానం ఎక్కువ గెలిచినా.. నేను ట్విట్టర్ నుంచి తప్పుకుంటా.
ఇవి బంగాల్ ఎన్నికలకు ముందు.. ప్రముఖ ఎన్నికల వ్యూహకర్త, తృణమూల్ కాంగ్రెస్ రాజకీయ సలహాదారు ప్రశాంత్ కిశోర్ చెప్పిన మాటలు.
ఆయన అనుకున్నదే జరిగింది. ప్రధాన మంత్రి నరేంద్ర మోదీ- హోం మంత్రి అమిత్ షా మాయ పనిచేయలేదు. ఈ రాజకీయ ఉద్ధండులకే సవాల్ విసిరి బంగాల్లో పైచేయి సాధించారు. దీని వెనుక కీలకంగా వ్యవహరించింది ఐ-ప్యాక్.
ఐ-ప్యాక్.. ఇండియన్ పొలిటికల్ యాక్షన్ కమిటీ. ఇదో ప్రైవేటు సంస్థ. ప్రశాంత్ కిషోరే దీని అధిపతి. ఎన్నికల్లో ప్రత్యర్థులను ఎదుర్కొనేలా ఆయా పార్టీలకు బలమైన వ్యూహాలు రచించడంలో పీకే దిట్ట. ఇప్పుడు.. తృణమూల్ కాంగ్రెస్ విజయంలోనూ ప్రశాంత్ కిశోర్, ఆయన సంస్థ ఐ-ప్యాక్ పాత్రే కీలకం.
అంతకుముందూ పలు రాష్ట్రాల అసెంబ్లీ, లోక్సభ ఎన్నికల్లో మ్యాజిక్ చూపిన పీకే.. బంగాల్లోనూ అదే పునరావృతం చేశారు.
2014లో ప్రధాని నరేంద్ర మోదీ అధికారంలోకి రావడానికి ఆయనే కీలక సూత్రధారి.
తెరవెనుక వ్యూహాలతో..
ఓ వైపు బంగాల్లో అభివృద్ధి, జాతీయ సమస్యలు, దేశ భద్రత, పౌరసత్వ సవరణ చట్టం వంటి అంశాలతో ప్రధాన ప్రత్యర్థి భాజపా బరిలోకి దిగితే.. స్థానిక అంశాలు, ఔట్ సైడర్స్ నినాదాన్ని ప్రజల్లోకి బలంగా తీసుకెళ్లడం, అభివృద్ధి కార్యక్రమాలు, సంక్షేమ పథకాలతోనే తృణమూల్ కాంగ్రెస్ తన ప్రచారాన్ని సాగించింది.
తృణమూల్ కాంగ్రెస్ ప్రచారాన్ని సామాన్యులకు మరింత చేరువ చేసేందుకు విస్తృతంగా పనిచేసింది ప్రశాంత్ కిశోర్ నేతృత్వంలోని ఐ-ప్యాక్. ప్రచార నినాదాలు, ఏ ప్రాంతంలో ఏ అంశాలపై దృష్టిపెట్టాలి, డిజిటల్ ప్రచారం ఎలా సాగాలి వంటి విషయాల్లో కీలక సూచనలు చేసింది. ఐ-ప్యాక్ సలహాలు పాటిస్తూ.. అభివృద్ధి-సంక్షేమ మంత్రంతో 'దీదీ' సేన సాగించిన ప్రచారం... టీఎంసీకి మరోమారు అఖండ విజయాన్ని కట్టబెట్టింది.
ఏమిటీ ఐ-ప్యాక్?
ఆయా రాష్ట్రాల స్థానిక పరిస్థితులకు తగినట్లు రాజకీయ వ్యూహాలు రచించే సంస్థగా ఐ-ప్యాక్కు మంచి పేరుంది. ఎన్నికల్లో గెలిచేందుకు రాజకీయ పార్టీలకు సలహాలు, సూచనలు అందిస్తుంది. 2014 సార్వత్రిక ఎన్నికల నుంచి ఈ సంస్థ అప్రతిహత విజయాలతో దూసుకెళ్తోంది.
2014 సార్వత్రికంలో నరేంద్రమోదీ ప్రచార సరళిని ఈ సంస్థే రూపొందించింది. ఎన్డీఏ ప్రభంజనంలో భాగమైంది.
2015 బిహార్ ఎన్నికల్లో నితీశ్ కుమార్(జేడీయూ), 2017 అసెంబ్లీ ఎన్నికల్లో అమరీందర్ సింగ్(కాంగ్రెస్), 2019 ఆంధ్రప్రదేశ్ ఎన్నికల్లో జగన్మోహన్ రెడ్డి(వైఎస్ఆర్సీపీ) ముఖ్యమంత్రులు కావడంలో ముఖ్య పాత్ర పోషించింది ఐ-ప్యాక్.
ఇప్పుడు మళ్లీ 2022 అసెంబ్లీ ఎన్నికల కోసం కూడా అమరీందర్ సింగ్.. తన ప్రధాన సలహాదారుగా ప్రశాంత్ కిశోర్ను నియమించుకున్నారు.
ఇదీ చూడండి: 'పంజాబ్ సీఎం'కు ప్రధాన సలహాదారుగా ప్రశాంత్ కిశోర్
వైవిధ్యభరితం
తక్కువ ఖర్చుతో వైవిధ్యభరితమైన ఎన్నికల ప్రచారం నిర్వహించడం ఐ-ప్యాక్ ప్రత్యేకత. వ్యక్తిగత గుర్తింపు ఇవ్వడం సహా విషయాన్ని నేరుగా ప్రజల్లోకి తీసుకెళ్లడానికి ప్రశాంత్ కిశోర్ నేతృత్వంలోని ఐ-ప్యాక్ అన్నివిధాలా ప్రయత్నిస్తూ ఉంటుంది.
2014 సార్వత్రిక ఎన్నికల్లో 'చాయ్ పే చర్చా' కార్యక్రమం ఎలాంటి ప్రభావం చూపిందో తెలియంది కాదు. భాజపా తరపున ప్రధాన మంత్రి అభ్యర్థిగా పోటీలో ఉన్న నరేంద్ర మోదీకి వ్యక్తిగత ప్రాచుర్యం కల్పించడానికి ఈ కార్యక్రమం ఎంతో ఉపయోగపడింది. గతంలో టీ అమ్ముకున్న ఓ సాధారణ వ్యక్తి దేశంలోనే అత్యంత శక్తివంతమైన పదవిని అధిరోహించాడనికి పోటీ పడుతున్నాడన్న భావన ప్రజల్లో కలగజేయడంలో సఫలమైంది. ఈ కార్యక్రమానికి నిర్వహణ ఖర్చు కేవలం రూ.3.5 కోట్లే కావడం గమనార్హం.
పంజాబ్ ఎన్నికల ప్రచారంలో భాగంగా ముఖ్యమంత్రి అభ్యర్థి అమరీందర్ సింగ్కు గుర్తింపు తేవడానికి చేపట్టిన కాఫీ విత్ కెప్టెన్, పంజాబ్ డ కెప్టెన్ వంటి కార్యక్రమాలు కూడా మంచి ఫలితాలు ఇచ్చాయి. ఆ ఎన్నికల్లో కాంగ్రెస్ పార్టీకి విజయ బాటలు పరిచాయి.
మమతా బెనర్జీ కోసం దీదీకే బోలో, ఆగే బడ్తా రహే బిహార్, ఫిర్ ఏక్ బార్ నితీశ్ కుమార్ వంటి కార్యక్రమాలు ప్రజల్లో ఆదరణ పెంచాయి.
పక్కా స్కెచ్తో..
ఈ విజయాలన్నీ సాధించడానికి కారణం మాత్రం నిరంతర పరిశోధనే అని చెబుతారు ఐ-ప్యాక్ సంస్థ ప్రతినిధులు. క్షేత్ర స్థాయిలో పరిస్థితులు తెలుసుకొని, బూత్ స్థాయిల్లో కమిటీలు ఏర్పాటు చేసి ప్రజలందరికీ పార్టీ అందుబాటులో ఉండేలా జాగ్రత్త పడతారు. అయితే తుది ఫలితం మాత్రం పార్టీ నేతలు, రాజకీయ నాయకుల చేతుల్లోనే ఉంటుందని వినయంగా చెబుతారు.
అన్ని రాష్ట్రాల్లోని ప్రతి నియోజకవర్గంలో తమ ప్రతినిధులను నియమించుకుంటుంది ఐ-ప్యాక్. వారి ద్వారా నియోజకవర్గాల్లోని సమస్యలను గుర్తించి వాటికి పరిష్కారాలు సూచిస్తుంది.
ముందే జట్టు కట్టి..
ఆయా రాష్ట్రాల్లో పీకే సక్సెస్ను చూసిన తృణమూల్ కాంగ్రెస్ బంగాల్ అసెంబ్లీ ఎన్నికలకు ముందు.. ఐ-ప్యాక్తో జట్టుకట్టింది. చాలా ముందుగానే ఎన్నికల వ్యూహరచన ప్రారంభించింది. ప్రజల సమస్యలను తెలుసుకునేందుకు ప్రత్యేక హెల్ప్లైన్, వెబ్సైట్లను ఏర్పాటు చేయించి.. పకడ్బందీ ప్రణాళికలు రచించింది.
తృణమూల్ హ్యాట్రిక్లో కీలక పాత్ర పోషించి.. ఐ-ప్యాక్ విజయపరంపర కొనసాగించింది.
ఊహించని షాక్..
అయితే.. ఎన్నికల ఫలితాలు పూర్తిగా వెలువడక ముందే ప్రశాంత్ కిశోర్ సంచలన ప్రకటన చేశారు. భవిష్యత్తులో ఇక ఏ పార్టీలకూ రాజకీయ వ్యూహకర్త బాధ్యతలు చేపట్టబోనని తెలిపారు. బంగాల్లో టీఎంసీ విజయంలో కీలక పాత్ర పోషించిన ఆయన.. ఎన్నికల సంఘం భాజపాకు సహకరించిందని ఓ టీవీ ఛానల్కు ఇచ్చిన ఇంటర్వ్యూలో ఆరోపించారు.
