Modi BIMSTEC summit: ఐరోపాలో ఇటీవలి పరిణామాలు అంతర్జాతీయ శాంతి భద్రతలపై ప్రశ్నలు లేవనెత్తాయని ప్రధానమంత్రి నరేంద్ర మోదీ అన్నారు. ఈ నేపథ్యంలో ప్రాంతీయ సహకారానికి అత్యంత ప్రాధాన్యం ఏర్పడిందని చెప్పారు. బిమ్స్టెక్ ఐదవ శిఖరాగ్ర సదస్సులో మాట్లాడిన మోదీ.. ఈ సంస్థ అభివృద్ధి కోసం సరికొత్త చార్టర్ను ప్రవేశపెడుతున్నట్లు తెలిపారు. సభ్య దేశాల మధ్య అత్యున్నత సహకారం అవసరం ఉందని అభిప్రాయం వ్యక్తం చేశారు. బంగాళాఖాతాన్ని అనుసంధానతకు, శ్రేయస్సుకు, భద్రతకు వారధిగా మార్చాల్సిన తరుణం ఆసన్నమైందని ఉద్ఘాటించారు.
MODI NEWS: బిమ్స్టెక్ సెక్రెటేరియట్ కోసం భారత్ ఒక మిలియన్ డాలర్లు అందించనుందని మోదీ ప్రకటించారు. 'ఐరోపాలో ఇటీవల జరుగుతున్న పరిణామాలు అంతర్జాతీయ సుస్థిరతపై అనేక ప్రశ్నలకు దారితీస్తున్నాయి. కాబట్టి, బిమ్స్టెక్ సామర్థ్యాన్ని పెంపొందించాల్సిన ఆవశ్యకత ఉంది. ఈ కూటమిని మరింత క్రియాశీలంగా మార్చాలి. ఆపరేషనల్ బడ్జెట్ పెంచేందుకు తాము ఇచ్చే నిధులు ఉపయోగపడతాయి. ఇందుకోసం బిమ్స్టెక్ సెక్రెటరీ జనరల్ రోడ్మ్యాప్ సిద్ధం చేయాలి. బంగాళాఖాతాన్ని అనుసంధాన వారధిగా మార్చే సమయం వచ్చేసింది. బిమ్స్టెక్ దేశాలన్నీ ఇందుకోసం కలిసికట్టుగా పనిచేయాలని పిలుపునిస్తున్నా. 1997లో మాదిరిగానే మనం మన లక్ష్యాలను నూతన ఉత్సాహంతో సాధించాలి. ఈ సదస్సు ఫలితాలు.. బిమ్స్టెక్ చరిత్రలో సువర్ణ అధ్యాయాన్ని లిఖిస్తాయి' అని మోదీ పేర్కొన్నారు.
వాతావరణ కేంద్రానికి 30 లక్షల డాలర్లు: సభ్య దేశాల మధ్య వర్తకాన్ని పెంపొందించే బిమ్స్టెక్ ఎఫ్టీఏ ప్రతిపాదనపై వేగంగా ముందుకు సాగాల్సిన అవసరం ఉందని మోదీ పేర్కొన్నారు. సభ్య దేశాల్లోని స్టార్టప్లు, వ్యాపారుల మధ్య మరింత సమాచార మార్పిడి జరిగేలా చూడాలని పిలుపునిచ్చారు. వర్తకం విషయంలో అంతర్జాతీయ నిబంధనలను ప్రవేశపెట్టే అంశాన్ని ప్రయత్నించాలని సూచించారు. బిమ్స్టెక్ ఆధ్వర్యంలోని వాతావరణ, శీతోష్ణస్థితి కేంద్రం ప్రాముఖ్యతను మోదీ ప్రస్తావించారు. విపత్తుల నిర్వహణ, వాటి ముప్పు తగ్గించే విషయంలో ఈ కేంద్రం మెరుగ్గా పనిచేస్తుందని అన్నారు. ఈ సంస్థను మరింత మెరుగ్గా తీర్చిదిద్దేందుకు భారత్ తరఫున 3 మిలియన్ డాలర్ల నిధులు అందిస్తామని ప్రకటించారు. మరోవైపు, నలంద అంతర్జాతీయ యూనివర్సిటీ ఇస్తున్న బిమ్స్టెక్ స్కాలర్షిప్ కార్యక్రమ పరిధిని పెంచుతున్నట్లు మోదీ తెలిపారు. క్రిమినల్ కేసుల విషయంలో న్యాయ సహాయం కోసం ఒప్పందంపై సంతకం చేస్తున్నట్లు సమావేశంలో ప్రకటించారు.
దక్షిణ, ఆగ్నేయాసియాలో ఉన్న ఏడు దేశాల కూటమిని బిమ్స్టెక్గా వ్యవహరిస్తారు. వివిధ రంగాల్లో ఆర్థిక, సాంకేతిక సహకారం కోసం ఈ కూటమిని ఏర్పాటు చేశారు. బంగ్లాదేశ్, భూటాన్, ఇండియా, నేపాల్, శ్రీలంక, మయన్మార్, థాయ్లాండ్ దేశాలు ఇందులో భాగస్వాములుగా ఉన్నాయి.
ఇదీ చదవండి: దళితుడిపై దారుణం.. హింసించి.. చెట్టుకు తలకిందులుగా వేలాడదీసి..
