ఉత్తర్ప్రదేశ్లోని కుషీనగర్లో నిర్మించిన కొత్త అంతర్జాతీయ విమానాశ్రయాన్ని ప్రారంభించారు ప్రధాని నరేంద్ర మోదీ. దశాబ్దాల ఆశలు, అంచనాలు ఫలించాయని ఈ సందర్భంగా వ్యాఖ్యానించారు. ఈ కార్యక్రమంలో విమానాయాన శాఖ మంత్రి జ్యోతిరాదిత్య సింధియా, ఉత్తర్ప్రదేశ్ గవర్నర్ ఆనందిబెన్ పటేల్, ముఖ్యమంత్రి యోగి ఆదిత్యనాథ్ పాల్గొన్నారు. శ్రీలంక ప్రధాని మహీంద రాజపక్స కుమారుడు, క్రీడా శాఖ మంత్రి రాజపక్స కూడా హాజరయ్యారు.
కుషీనగర్ ఎయిర్పోర్ట్ విమానయాన రంగానికి సరికొత్త శక్తిని ఇస్తుందని, పర్యటకం కొత్త పుంతలు తొక్కుతుందని అభిప్రాయపడ్డారు మోదీ. పెట్టుబడులు పెరుగుతాయని, ఉద్యోగాల కల్పన జరుగుతుందని అన్నారు.
''దశాబ్దాల తరబడి ఆశలు, ఎన్నో అంచనాల సాకారమే.. కుషీనగర్ విమానాశ్రయం. ఈ రోజు నా సంతోషం రెట్టింపైంది. నా జీవిత ప్రయాణంలో ఇప్పుడు సంతృప్తి నెలకొంది.''
- నరేంద్ర మోదీ, ప్రధాన మంత్రి
మందిరంలో పూజలు..
అనంతరం.. మహాపరినిర్వాణ మందిరాన్ని సందర్శించారు మోదీ. అక్కడ బుద్ధుడికి పూజలు చేసి.. విగ్రహానికి చీవర్(ఒక వస్త్రం) సమర్పించారు. ఆ తర్వాత.. ఒక బోధి వృక్షం కూడా నాటారు.
అభిధమ్మ దినోత్సవం సందర్భంగా ఏర్పాటు చేసిన కార్యక్రమానికి హాజరైన మోదీ.. అక్కడ బౌద్ధ సన్యాసులకు కూడా చీవర్లు అందజేశారు. శ్రీలంక, థాయిలాండ్, మయన్మార్, దక్షిణ కొరియా, నేపాల్, భూటాన్, కంబోడియా సహా ఇతర దేశాల నుంచి ప్రతినిధులు ఈ ఈవెంట్లో పాల్గొన్నారు.
తీర్థయాత్రలకు ఊతం..
కుషీనగర్ బౌద్ధులకు అత్యంత ప్రసిద్ధ క్షేత్రాల్లో ఒకటి. గౌతమ బుద్ధుడు.. తన చివరి రోజుల్లో (మహాపరినిర్వాణం) ఇక్కడే గడిపారు. అందుకే ప్రపంచవ్యాప్తంగా బౌద్ధ సాధువులు ఏటా ఇక్కడకు వస్తుంటారు. ముఖ్యంగా శ్రీలంకలో నివసించే బౌద్ధులు.. ఇప్పుడు ఈ ప్రాంతాన్ని సందర్శించడానికి మార్గం సులభం కానుంది. వీరికి సౌలభ్యం కల్పించడం సహా బౌద్ధ తీర్థయాత్రను మరింత ప్రోత్సహించే విధంగా ఇక్కడ అంతర్జాతీయ విమానాశ్రయాన్ని ఏర్పాటు చేసింది మోదీ ప్రభుత్వం. దాదాపు రూ.260కోట్లతో దీన్ని నిర్మించింది.
ఇదీ చూడండి: 'వారు ఎంతటి బలవంతులైనా విడిచిపెట్టేది లేదు'
