PFI raids by NIA : ఉగ్రవాద కార్యకలాపాలకు నిధుల సమీకరణ ఆరోపణలు ఎదుర్కొంటున్న పాపులర్ ఫ్రంట్ ఆఫ్ ఇండియా-పీఎఫ్ఐపై కేంద్ర సంస్థలు మరోమారు గురిపెట్టాయి. కేంద్ర దర్యాప్తు సంస్థ(ఎన్ఐఏ), ఎన్ఫోర్స్మెంట్ డైరక్టరేట్(ఈడీ) మంగళవారం సంయుక్త ఆపరేషన్ చేపట్టి.. 170కి పైగా మందిని అదుపులోకి తీసుకున్నాయి. 7 రాష్ట్రాల్లో PFI సంస్థతో సంబంధం ఉన్న అనేక మంది సభ్యులు, సంస్థ కార్యాలయాల్లో సోదాలు నిర్వహించాయి. ఉత్తర్ప్రదేశ్, మధ్యప్రదేశ్, దిల్లీ, కేరళ, గుజరాత్, కర్ణాటక, అసోంలో ఈ దాడులు జరిగాయి. ఈ ఆపరేషన్లో కేంద్ర నిఘా సంస్థ-ఐబీ, ఆయా రాష్ట్రాల పోలీసులు కూడా భాగమైనట్లు ఎన్ఐఏ కేంద్ర కార్యాలయం వెల్లడించింది.
- పీఎఫ్ఐ కేసు దర్యాప్తులో భాగంగా దేశ రాజధానిలో 30 మంది కార్యకర్తలను అరెస్ట్ చేశారు అధికారులు. నిజాముద్దీన్, రోహిణి, ఈశాన్య దిల్లీలోని అనేక ప్రదేశాల్లో అర్థరాత్రి నుంచి సోదాలు నిర్వహించారు దిల్లీ స్పెషల్ సెల్ పోలీసులు.
- కర్ణాటకలో 40 మందికిపైగా అదుపులోకి తీసుకున్నట్లు ఆ రాష్ట్ర పోలీసులు తెలిపారు. ప్రస్తుతం దక్షిణ కన్నడ, ఉడుపి జిల్లాలో దాడులు కొనసాగుతున్నాయని చెప్పారు. నిందితులపై సీఆర్పీసీ 107, 151 సెక్షన్ల కింద కేసులు నమోదు చేశామని పేర్కొన్నారు.
- గుజరాత్లో సుమారు 10 మంది కార్యకర్తలను అదుపులోకి తీసుకున్నారు పోలీసులు. పాపులర్ ఫ్రంట్ ఆఫ్ ఇండియా సంస్థతో వీరికి ఉన్న సంబంధాలపై ప్రశ్నిస్తున్నట్లు చెప్పారు. ఉగ్రవాద నిరోధక దళం, జాతీయ దర్యాప్తు సంస్థ అధికారులు కలిసి సంయుక్తంగా ఈ ఆపరేషన్ను చేపట్టారు.
- ఈ కేసుతో సంబంధం ఉన్న 25 మందిని మహారాష్ట్రలో అదుపులోకి తీసుకున్నారు. పుణె నగరంలో ఆరుగురిని అరెస్టు చేశారు.
- పీఎఫ్ఐతో సంబంధం ఉన్న కేసులో 25 మంది కార్యకర్తలను అరెస్ట్ చేశారు అసోం పోలీసులు. గోపాల్పురలో 10 మంది, కంరూప్లో ముగ్గురు, బార్పేట, బక్సా, దర్రాంగ్, ఉదల్గురి, కరీంగంజ్లో మిగిలిన వారిని అరెస్ట్ చేశారు.
రూ.5కోట్ల పరిహారం కోసం డిమాండ్..
మరోవైపు, ఈ సోదాలను నిరసిస్తూ నిర్వహించిన హర్తాళ్లో ధ్వంసమైన ఆస్తులకు పీఎఫ్ఐ పరిహారం చెల్లించాలంటూ హైకోర్టును ఆశ్రయించింది కేరళ ఆర్టీసీ. పీఎఫ్ఐ నుంచి రూ.5 కోట్ల పరిహారం ఇప్పించాలని కోరుతూ కోర్టులో వ్యాజ్యం వేసింది.
పీఎఫ్ఐ లక్ష్యంగా కేంద్ర దర్యాప్తు సంస్థలు దాడులు చేయడం.. గత రెండు వారాల్లో ఇది మూడోసారి.సెప్టెంబర్ 22న దేశవ్యాప్తంగా ఎన్ఐఏ విస్తృత సోదాలు నిర్వహించింది. దేశంలో తీవ్రవాద కార్యకలాపాలకు మద్దతు ఇస్తున్నారనే ఆరోపణలపై 11 రాష్ట్రాల్లోని 106 మంది పీఎఫ్ఐ కార్యకర్తలను అరెస్టు చేసింది. కేరళలో అత్యధిక అరెస్టులు జరిగాయి. దాదాపు 22 మందిని అరెస్టు చేశారు. మహారాష్ట్ర, కర్ణాటక (20), తమిళనాడు (10), అసోం (9), ఉత్తరప్రదేశ్ (8), ఆంధ్రప్రదేశ్ (5), మధ్యప్రదేశ్ (4) , పుదుచ్చేరి, దిల్లీ (3) రాజస్థాన్ (2)లోనూ పలువురిని అరెస్టు చేసింది.
అసలు ఎందుకీ ఆపరేషన్?
ఉగ్రవాద కార్యకలాపాలకు నిధులు సమకూర్చేవారు, ముష్కరుల కోసం శిక్షణా కార్యక్రమాలు నిర్వహించేవారు, నిషేధిత సంస్థల్లో చేరేలా ప్రజల్ని ప్రభావితం చేసేవారిని లక్ష్యంగా చేసుకుని ఈ ఆపరేషన్ చేపట్టామన్నది ఎన్ఐఏ మాట. ఇటీవల అనేక వివాదాలతో వార్తల్లో నిలిచిన పాపులర్ ఫ్రంట్ ఆఫ్ ఇండియా-పీఎఫ్ఐ కార్యాలయలాపైనే జాతీయ దర్యాప్తు సంస్థ ప్రధానంగా గురిపెట్టింది.
అసలేంటీ పీఎఫ్ఐ?
2006లో కేరళలో ఏర్పాటైంది పీఎఫ్ఐ. ప్రస్తుతం దిల్లీలో ప్రధాన కార్యాలయం ఉంది. అణగారిన వర్గాల సాధికారతే తమ లక్ష్యమని ఆ సంస్థ చెబుతూ ఉంటుంది. కానీ.. దేశంలోని భద్రతా సంస్థల వాదన మాత్రం భిన్నం. అతివాద ఇస్లాంను పీఎఫ్ఐ ప్రోత్సహిస్తోందన్నది ప్రభుత్వ వర్గాల ప్రధాన ఆరోపణ.
పీఎఫ్ఐపై ఇంకేమైనా కేసులు ఉన్నాయా?
అవును. పీఎఫ్ఐపై ఇంతకముందు కూడా ఇలాంటి దాడులు జరిగాయి. పౌరసత్వ చట్టం వ్యతిరేక ఆందోళనలు, 2020 దిల్లీ అల్లర్లు, యూపీ హాథ్రస్లో దళిత బాలిక సామూహిక అత్యాచారం వ్యవహారంలో కుట్ర సహా మరికొన్ని సందర్భాల్లో.. పీఎఫ్ఐ ఆర్థిక వనరులు సమకూర్చిందన్న ఆరోపణలపై ఎన్ఫోర్స్మెంట్ డైరక్టరేట్ దర్యాప్తు చేస్తోంది. లఖ్నవూలోని పీఎంఎల్ఏ ప్రత్యేక కోర్టులో ఇప్పటికే రెండు అభియోగ పత్రాలు కూడా దాఖలు చేసింది.
'భారత్ను ఇస్లామిక్ దేశంగా మార్చేందుకు కుట్ర'.. 'PFIని బ్యాన్ చేయండి'
