Goondas arrested in Kerala: సుమారు 20 రోజుల వ్యవధిలోనే రాష్ట్రవ్యాప్తంగా 13వేల మంది గూండాలను అరెస్టు చేశారు కేరళ పోలీసులు. గతేడాది డిసెంబర్ 18 నుంచి ఈ ఏడాది జనవరి 9 వరకు ఈ అరెస్టులు జరిగాయి. సంఘ విద్రోహక శక్తుల అణచివేతలో భాగంగా ఈ మేరకు చర్యలు తీసుకున్నారు పోలీసులు.
2021 డిసెంబర్ ఆరంభంలో అలప్పుజలో ఎస్డీపీఐ సహా ఓ భాజపా నేత గంటల వ్యవధిలో హతమయ్యారు. దాంతోపాటు కేరళ వ్యాప్తంగా పలు హింసాత్మక ఘటనలు చోటుచేసుకున్నాయి. ఈ నేపథ్యంలోనే గూండాలపై ఉక్కుపాదం మోపారు పోలీసులు.
రాష్ట్రవ్యాప్తంగా 16,680 ప్రాంతాల్లో 13,032 మంది గూండాలను పోలీసులు అరెస్టు చేశారు. 5987 మొబైల్ ఫోన్లను స్వాధీనం చేసుకున్నారు. అంతేగాక కేరళ యాంటీ సోషల్ యాక్టివిటీస్ (ప్రివెన్షన్) యాక్ట్ కింద 215 మందిపై కేసు నమోదు చేశారు.
ఇదీ చూడండి: 12 గంటల వ్యవధిలో ఇద్దరు రాజకీయ నేతల హత్య
