కొవిడ్ విజృంభణ వేళ తమ పార్టీ.. ప్రజలకు సాయపడుతోంటే ప్రతిపక్ష నేతలు మాత్రం సామాజిక మాధ్యమాలకే పరిమితమయ్యారని భాజపా జాతీయ అధ్యక్షుడు జేపీ నడ్డా విమర్శించారు. ట్విట్టర్ లేదా విలేకరుల సమావేశంలో మాత్రమే వాళ్లు కనిపిస్తున్నారని ఎద్దేవా చేశారు. భాజపా మినహా అన్ని పార్టీలు క్వారంటైన్లోకి వెళ్లాయని వ్యాఖ్యానించారు. మరికొన్ని పార్టీలైతే ఐసీయూలో కాలం వెళ్లదీస్తున్నాయన్నారు. భాజపా సిద్ధాంతకర్త శ్యామ ప్రసాధ్ ముఖర్జీ వర్ధంతి సందర్భంగా దిల్లీలో నిర్వహించిన కార్యక్రమాల్లో ఆయన పాల్గొన్నారు.
"కొవిడ్ టీకాల విషయంలో ప్రజలను కాంగ్రెస్ తప్పుదోవ పట్టిస్తోంది. అదే సమయంలో ఆ పార్టీకి చెందిన నేతలు మౌనంగా వ్యాక్సిన్ వేయించుకుంటున్నారు. ఏ కాంగ్రెస్ నేతైనా నిల్చుని తాను టీకా వేయించుకోలేదని చెప్పగలరా? కరోనా విజృంభణ సమయంలో మేము సాధక్లుగా వ్యవహరిస్తోంటే.. ప్రతిపక్షమేమో బాధక్లాగా వ్యవహరిస్తోంది."
-జేపీ నడ్డా, భాజపా జాతీయ అధ్యక్షుడు
శ్యామ్ ప్రసాద్ మఖర్జీ వర్ధంతిని పురస్కరించుకుని దిల్లీలోని భాజపా కార్యాలయంలో కరోనా సామగ్రి పంపిణీ కార్యక్రమాన్ని నడ్డా ప్రారంభించారు. శ్యామ ప్రసాద్ ముఖర్జీకి నివాళిగా.. జులై 6 వరకు తమ పార్టీ కార్యకర్తలు 5 లక్షల మొక్కలు నాటాలని నిర్ణయించుకున్నామని తెలిపారు.
ఈ ఏడాది చివరినాటికి భారత్ 257 కోట్ల టీకా డోసులను సమకూర్చుకుంటుందని నడ్డా పేర్కొన్నారు. మోదీ ప్రభుత్వం చేపట్టిన కొవిడ్ వ్యతిరేక పోరులో ప్రజలు అపూర్వ మద్దతునిస్తున్నారని తెలిపారు.
'అది.. తరతరాల సంప్రదాయమే'
భారత్లో సోమవారం రికార్డు స్థాయిలో జరిగిన టీకా పంపిణీ.. ఆ మరుసటి రోజు గణనీయంగా తగ్గింది. దీంతో కేంద్రంపై విమర్శలు గుప్పించారు కేంద్ర మాజీ మంత్రి, కాంగ్రెస్ నేత పి. చిదంబరం. "ఆదివారం కూడబెట్టి.. సోమవారం వ్యాక్సిన్ వేసి.. మంగళవారం తిరిగి నెమ్మదించడమే- వ్యాక్సినేషన్‌లో 'ప్రపంచ రికార్డు' వెనుక రహస్యమిదే" అంటూ వ్యంగ్యాస్త్రాలు సంధించారు. దీనిపై నడ్డా ట్విట్టర్ వేదికగా ఆగ్రహం వ్యక్తం చేశారు. టీకా పంపిణీలో భారత్ నెమ్మదించలేదన్న ఆయన.. మంగళ, బుధవారాల్లోనూ 50 లక్షల డోసులను పంపిణీ చేసిందని పేర్కొన్నారు. దేశం ఏదైనా రికార్డు సాధిస్తే తట్టుకోలేకపోవటం.. కాంగ్రెస్ సంప్రదాయమేనని విమర్శించారు.
ఇదీ చూడండి: పేదలకు మరో 5 నెలలు ఉచిత రేషన్
ఇదీ చూడండి: 'దేశ సమగ్రతలో ఆయన కృషి చిరస్మరణీయం'
