Odisha Train Accident CBI : ఒడిశాలో 293 మంది ప్రయాణికులను పొట్టన పెట్టుకున్న బాలేశ్వర్ రైలు ప్రమాదంపై కేంద్ర దర్యాప్తు బృందం (సీబీఐ) చేస్తున్న దర్యాప్తులో కీలక పరిణామం జరిగింది. ఈ కేసు విచారణలో భాగంగా బాలేశ్వర్ సీనియర్ సెక్షన్ ఇంజనీర్ (సిగ్నల్) అరుణ్ కుమార్ మొహంతా, సెక్షన్ ఇంజనీర్ మహ్మద్ అమీర్ ఖాన్, టెక్నీషియన్ పప్పు కుమార్ను సీబీఐ.. శుక్రవారం అరెస్ట్ చేసింది. హత్య, ఆధారాల ధ్వంసానికి సంబంధించిన పలు సెక్షన్ల కింద వీరిని అరెస్ట్ చేసింది. వీరంతా బాలేశ్వర్ జిల్లాలో విధులు నిర్వర్తించారు.
అయితే, జూన్ 19న కేసు విచారణలో భాగంగా అమీర్ ఖాన్ అద్దె ఇంటికి సీబీఐ సీల్‌ వేసింది. ఆ తర్వాతి రోజు అతడి సమక్షంలోనే ఆ ఇంట్లో సీబీఐ అధికారులు తనిఖీలు నిర్వహించారు. దీనికంటే ముందు అమీర్ ఖాన్‌ను రహస్య ప్రాంతానికి తరలించి సుదీర్ఘంగా విచారించారు. ఎలక్ట్రానిక్ ఇంటర్‌లాకింగ్ సిస్టమ్‌ను తారుమారు చేయడం వల్లే ప్రమాదం జరిగినట్లు ఆరోపణలు వచ్చిన నేపథ్యంలో ఈ ప్రమాదంపై కేంద్ర ప్రభుత్వం సీబీఐ విచారణకు ఆదేశించింది. ఈ ప్రమాదంపై జూన్ 6న సీబీఐ దర్యాప్తు చేపట్టింది. అప్పటి నుంచి జరుగుతున్న దర్యాప్తు.. జేఈ అమీర్ ఖాన్ ఇంటికి సీల్‌ వేసిన నేపథ్యంలో కీలక మలుపు తిరిగింది.
Odisha Train Accident CRS : సీబీఐతో పాటు ఈ ఘటనపై దర్యాప్తు చేపట్టిన రైల్వే భద్రతా కమిషన్-CRS.. గత నెల ఐదుగురు ఉద్యోగులను విచారించింది. రైళ్లు ఢీకొనకుండా కాపాడే ఇంటర్‌లాకింగ్ వ్యవస్థ ట్యాంపరింగ్ జరిగిందా లేదా సాంకేతిక లోపమా లేదా నిర్లక్ష్యమా అన్న కోణంలో దర్యాప్తు చేస్తోంది.
మాటలకు అందని విషాదం..
జూన్ 2న బాలేశ్వర్లో షాలిమార్- చెన్నై కోరమాండల్ రైలు.. ఆగి ఉన్న గూడ్స్ను ఢీకొట్టగా పెను ప్రమాదం జరిగింది. గూడ్స్ను అతివేగంగా ఢీకొట్టిన తర్వాత కోరమాండల్ రైలు బోగీలు చెల్లాచెదురుగా పడిపోయాయి. ఈ బోగీలను బెంగళూరు- హవ్డా సూపర్ఫాస్ట్ ఎక్స్ప్రెస్ ఢీకొట్టగా.. ప్రమాదం మరింత తీవ్రంగా మారింది. ఈ ఘటనలో ఇప్పటివరకు 293 మంది ప్రాణాలు కోల్పోయారు. వెయ్యి మందికి పైగా గాయపడ్డారు. ఈ ఘటనలో కుట్ర కోణం ఉందని అనుమానాలు వ్యక్తమవుతున్న నేపథ్యంలోనే సీబీఐ ఈ కేసు విచారణ చేపట్టింది.
