No Caste no religion Certificate: గుజరాత్ హైకోర్టులో అరుదైన, ఆసక్తికరమైన పిటిషన్ దాఖలైంది. సూరత్కు చెందిన ఓ బ్రాహ్మణ యువతి.. తనకు ఏ మతం, కులం లేదని రాసి ఉన్న ధ్రువపత్రం జారీ చేసేలా ప్రభుత్వాన్ని ఆదేశించాలని కోర్టును ఆశ్రయించారు. ప్రస్తుతం రాష్ట్రంతో పాటు దేశవ్యాప్తంగా ఈ విషయం చర్చనీయాంశంగా మారింది. సూరత్కు చెందిన కాజల్ మంజుల.. తన కుల ధ్రువీకరణ పత్రం నుంచి కులం, మతం తొలగించాలని పిటిషన్లో కోరారు. కులం, మతం లేకుండానే తనకు ధ్రువపత్రం జారీ చేయాలని విన్నవించారు.
కులం, మతం విషయంపై హైకోర్టును ఆశ్రయించటం రాష్ట్ర చరిత్రలోనే ఇదే తొలిసారి. భవిష్యత్తులో తాను ఎక్కడా కులం, మతం చెప్పుకోకూడదని నిర్ణయించకున్నట్లు తెలిపారు కాజల్. మన దేశంలో కులం, మతం పేరుతో వివక్ష రాజ్యమేలుతున్న కారణంగా పిటిషనర్ చాలా ఇబ్బందులకు గురయ్యారని ఆమె తరఫు న్యాయవాది ధర్మేశ్ గుర్జార్ తెలిపారు. ఆమె రాజ్గర్ బ్రాహ్మణ సమాజానికి చెందినవారని, ఈ వివక్షపూరితమైన సమాజంలో చాలా ఇబ్బందులు ఎదుర్కొన్నట్లు చెప్పారు. మద్రాస్ హైకోర్టు గతంలో ఇచ్చిన ఆదేశాల ఆధారంగా గుజరాత్ హైకోర్టును పిటిషనర్ ఆశ్రయించినట్లు చెప్పారు న్యాయవాది. కులం మతం లేకుండానే స్నేహా ప్రతిభరాజ్ అనే యువతికి సర్టిఫికెట్ జారీ చేయాలని రాష్ట్ర ప్రభుత్వాన్ని మద్రాస్ హైకోర్టు ఆదేశించినట్లు గుర్తు చేశారు.
కారణం ఇది: 2017లో కాజల్ కుటుంబం మతం మారేందుకు ప్రయత్నించగా జిల్లా కలెక్టర్ నిరాకరించారు. చట్టం పరిధికి లోబడి ఒక మతం నుంచి మరో మతంలోకి మార్చొచ్చని, కానీ లౌకిక లేదా నాస్తికుడిగా మారేందుకు ఎటువంటి నిబంధన లేదని చెప్పారు. దీంతో ఆమె హైకోర్టును ఆశ్రయించారు. త్వరలోనే ఈ పిటిషన్పై కోర్టు విచారణ చేపడుతుందని తెలిపారు న్యాయవాది.
ఇదీ చూడండి: సూపర్ బ్రదర్స్.. నడవలేని చెల్లిని డోలీలో మోస్తూ పరీక్షా కేంద్రానికి...
