Nitish Kumar in Assembly: బిహార్ శాసనసభ బడ్జెట్ సమావేశాల్లో అనూహ్య పరిణామం చోటు చేసుకుంది. ముఖ్యమంత్రి నితీశ్ కుమార్ ఆగ్రహంతో ఊగిపోయారు. ఓ విషయంపై స్పీకర్ విజయ్ సిన్హా, సీఎం నితీశ్ మధ్య తీవ్ర వాగ్వాదం జరిగింది. ఈ క్రమంలోనే విపక్షాలతో పాటు అధికార కూటమిలోని భాజపా ఎమ్మెల్యేలు సైతం నిరసనలు చేపట్టటం వల్ల సభ దద్దరిల్లింది.
ఇదీ జరిగింది..
శాసనసభ స్పీకర్ విజయ్ సిన్హా ఇటీవల లఖీసరాయ్ పర్యటనకు వెళ్లిన క్రమంలో ఆయనతో స్థానిక పోలీసులు అనుచితంగా ప్రవర్తించారు. ఈ అంశంపై రాష్ట్ర డీజీపీకి ఫిర్యాదు చేయగా బాధ్యులపై చర్యలు తీసుకుంటామని స్పీకర్కు హామీ ఇచ్చారు. అయితే, ఇప్పటి వరకు వారిపై ఎలాంటి చర్యలు తీసుకోకపోవటంపై సభలో అసహనం వ్యక్తం చేశారు స్పీకర్. ప్రభుత్వం ఈ విషయాన్ని పట్టించుకోవటం లేదని ఆరోపించారు. దీనికి విపక్షాలతో పాటు అధికార కూటమిలోని భాజపా సైతం మద్దతు తెలిపింది.
ఈ విషయాన్ని లేవనెత్తటంపై ఆగ్రహం వ్యక్తం చేసిన ముఖ్యమంత్రి నితీశ్ కుమార్.. శాంతి భద్రతల అంశాన్ని సభలోకి తీసుకురావాల్సిన అవసరం లేదని స్పష్టం చేశారు. సభలో ఈ అంశాన్ని పదేపదే ప్రస్తావించటం సరైంది కాదని చెప్పారు. ఏ వ్యవస్థ అయినా రాజ్యాంగం ద్వారా నడుస్తుందని గుర్తుచేశారు. ఏ నేరమైనా కోర్టుకు వెళ్తుందని, శాసనసభ పరిధిలోకి రాదని స్పష్టం చేశారు. అనవసరంగా ఈ అంశాన్ని సభలోకి తీసుకురాకూడదని చెప్పారు.
" మా ప్రభుత్వం ఎవరి పట్ల పక్షపాతంగా వ్యవహరించదు. సమాధానం చెబుతున్నప్పుడు సభలో గందరగోళం ఎందుకు సృష్టిస్తున్నారు. రాజ్యాంగం ఏం చెబుతుందో తెలుసుకోండి. మీరు అడిగిన వాటికి సమాధానం చెబుతున్నాం. మళ్లీమళ్లీ ఈ అంశాన్ని ఎందుకు లేవనెత్తుతున్నారు. ఈ విధంగా సభ జరగటం సరైంది కాదు."
- నితీశ్ కుమార్, బిహార్ ముఖ్యమంత్రి.
అయితే, సభలో లేవనెత్తాల్సిన అంశాలు, సభ ఏవిధంగా నడిపించాలనేది మీరు చెప్పటమేంటని స్పీకర్ అనగా.. ఇద్దరి మధ్య చిన్నపాటి మాటల యుద్ధమే జరిగింది. కొద్దిసేపు సభలో గందరగోళం ఏర్పడింది.
ఇదీ చూడండి: జమ్ముకశ్మీర్ బడ్జెట్ ప్రవేశపెట్టిన నిర్మల
