New Pension Scheme 2023 : కొత్త పింఛన్ విధానంలో మార్పులు తీసుకువస్తున్నట్లు మీడియాలో వస్తున్న కథనాలను కేంద్ర ఆర్థిక శాఖ ఖండించింది. అవన్నీ అసత్య ప్రచారాలని వెల్లడించింది. ఆ అంశంపై ఇంకా చర్చలు జరుగుతూనే ఉన్నాయని తెలిపింది. దానిపై ఇంకా ఎటువంటి నిర్ణయం తీసుకోలేదని ఆర్థిక శాఖ పేర్కొంది. కాగా ప్రస్తుతమున్న విధానానికి బదులుగా ఉద్యోగుల చివరి జీతంలో 40-45 శాతాన్ని.. పింఛన్గా వారికిచ్చేందుకు ప్రభుత్వం ప్రతిపాదిస్తున్నట్లు గతంలో కొన్ని కథనాలు వెలువడ్డాయి. దీనిపై గురువారం ఆర్థిక శాఖ వివరణ ఇచ్చింది. అవన్నీ అవాస్తవాలని కొట్టిపారేసింది.
"కొత్త ఫించన్ విధానంలో ప్రభుత్వం మార్పులు తీసుకువస్తున్నట్లు.. పలు వార్తాపత్రికల్లో కథనాలు వెలువడ్డాయి. అవన్నీ నిజం కావు. గత లోక్సభ సమావేశాల్లోనే కేంద్ర ఆర్థిక శాఖ కార్యదర్శి నేతృత్వంలో.. దీనిపై ఓ కమిటీని ఏర్పాటు చేశాం. ఎన్పీఎస్ విషయంలో చర్చలు కొనసాగుతూనే ఉన్నాయి. ఇంకా ఎటువంటి నిర్ణయం తీసుకోలేదు. వాటాదారులతో కమిటీ సంప్రదింపులు జరుగుతోంది" అని కేంద్ర ఆర్థిక శాఖ ట్వీట్ చేసింది. భాజపాయేతర పార్టీలు అధికారంలో ఉన్న రాష్ట్రాలు.. ఇప్పటికే పాత పింఛన్ విధానాన్నితిరిగి ప్రవేశపెట్టాయి. ప్రభుత్వ ఉద్యోగులు డిమాండ్తో, ఇతర వర్గాల ఒత్తిడితో ఈ దిశగా ఆ రాష్ట్రాలు నిర్ణయం తీసుకున్నాయి. పంజాబ్, రాజస్థాన్, ఛత్తీస్గఢ్, హిమాచల్ ప్రదేశ్, ఝార్ఖండ్, వంటి ప్రతిపక్షపాలిత రాష్ట్రాలు పాత పింఛన్ విధానం వైపే తిరిగి అడుగులేశాయి.
పాత ఫించన్ విధానం ప్రకారం.. ప్రభుత్వ ఉద్యోగులు తాము చివరగా తీసుకున్న జీతంలో.. 50 శాతాన్ని పింఛన్గా పొందుతారు. కొత్త పింఛన్ విధానంలో తమ జీతంలో కొంత మొత్తాన్ని పెన్షన్ ఫండ్లో ఉద్యోగులు జమ చేస్తారు. వారు జమచేసిన సొమ్ము ఆధారంగా పదవి విరమణ సమయంలో.. ఒకే సారి ఆ మొత్తాన్ని పొందుతారు. పాత ఫించన్ విధానాన్ని 2003 డిసెంబర్లో నిలిపివేసింది అప్పటి ప్రభుత్వం. అనంతరం 2004 ఏప్రిల్ 1 నుంచి కొత్త పింఛన్ విధానాన్ని ప్రవేశపెట్టింది.
ఓపీఎస్ పునరుద్ధరించాలంటూ నిరసనలు.. కేంద్రం బెదిరింపులు..
గత కొంత కాలంగా కొత్త పింఛన్ విధానంపై ఉద్యోగుల్లో తీవ్ర అసంతృప్తి నెలకొంది. పాత పెన్షన్ విధానాన్ని(ఓపీఎస్) పునరుద్ధరించాలంటూ వారు నిరసనలు కూడా చేపట్టారు. ఈ నేపథ్యంలోనే నిరసనల్లో పాల్గొనకూడదని ప్రభుత్వ ఉద్యోగులకు కేంద్రం సూచించింది. ఈ సూచనను అతిక్రమిస్తే తీవ్ర పరిణామాలు ఎదుర్కోవాల్సి ఉంటుందని హెచ్చరించింది. కొద్ది రోజుల క్రితం దేశవ్యాప్తంగా అన్ని జిల్లా కేంద్రాల్లో ర్యాలీలు చేపట్టాలని జాయింట్ ఫోరమ్ ఫర్ రీస్టోరేషన్ ఆఫ్ ఓల్డ్ పెన్షన్ స్కీమ్ ఆధ్వర్యంలోని నేషనల్ జాయింట్ కౌన్సిల్ పిలుపునిచ్చింది. ఆ ర్యాలీల్లో ఎట్టి పరిస్థితుల్లోనూ పాల్గొనకూడదని కేంద్రం చెప్పింది. పూర్తి కథనం కోసం ఇక్కడ క్లిక్ చేయండి.
