ఎన్సీపీ అధ్యక్షుడు శరద్ పవార్ ఇంటికి గుర్తు తెలియని వ్యక్తి నుంచి బెదిరింపు కాల్స్ వచ్చాయి. ఆయన్ను హత్య చేస్తామంటూ దుండగులు బెదిరింపులకు పాల్పడ్డారు. సోమవారం శరద్ పవార్ పుట్టినరోజు కాగా.. అదేరోజు ఈ బెదిరింపు కాల్ రావడం కలకలం రేపింది. ఇదివరకే ఇలా పలుమార్లు కాల్స్ వచ్చిన నేపథ్యంలో.. భయభ్రాంతులకు గురైన కుటుంబసభ్యులు పోలీసులకు సమాచారం అందించారు.
అసలేం జరిగింది: ఎన్సీపీ నేత శరద్ పవార్ సిల్వర్ ఓక్ నివాసానికి గుర్తు తెలియని వ్యక్తి ఫోన్ చేసి ఆయన్ను చంపేస్తానని బెదిరించాడు. దీంతో కుటుంబసభ్యులు పోలీసులకు ఫిర్యాదు చేయగా వారు కేసు నమోదు చేసి దర్యాప్తు ప్రారంభించారు. విచారణలో కాల్డేటా ఆధారంగా బిహార్కు చెందిన నారాయణ్ సోనీ అనే వ్యక్తి పేరు తెరపైకి వచ్చింది. దీంతో అతన్ని అదుపులోకి తీసుకుని విచారణ చేపట్టారు. అయితే ఈ వ్యక్తి ఇదివరకే పలు మార్లు పవార్ ఇంటికి కాల్ చేశాడని అప్పట్లో అతన్ని అదుపులోకి తీసుకున్న పోలీసులు మందలించి వదిలేశారని తెలిపారు. ఈ క్రమంలో సోమవారం వచ్చిన కాల్తో అతనే దీనికి కారణమని కన్ఫార్మ్ చేసుకున్న పోలీసులు నిందితుడిని పట్టుకున్నారు.
