నారదా స్టింగ్ కేసులో మంత్రులను గృహ నిర్బంధంలో ఉంచాలని మే 21న కోల్కతా హైకోర్టు ఇచ్చిన తీర్పును సవాలు చేస్తూ.. కేంద్ర దర్యాప్తు సంస్థ(సీబీఐ) సుప్రీంకోర్టును సోమవారం ఆశ్రయించింది. ఈ కేసులో బంగాల్ మంత్రులు ఫిర్హాద్ హకీం, సుబ్రతా ముఖర్జీ, ఎమ్మెల్యే మదన్ మిత్రా, మాజీ మేయర్ సోవన్ ఛటర్జీని గత సోమవారం సీబీఐ అరెస్టు చేసింది.
నిందితులకు ప్రత్యేక న్యాయస్థానం బెయిల్ ఇవ్వగా, దాన్ని సవాలు చేస్తూ సీబీఐ.. కోల్కతా హైకోర్టును ఆశ్రయించింది. ఈ కేసును తాత్కాలిక ప్రధాన న్యాయమూర్తి జస్టిస్ రాజేశ్ బిందాల్, జస్టిస్ అర్జిత్ బెనర్జీలతో కూడిన ధర్మాసనం విచారణకు స్వీకరించింది. బెయిల్ మంజూరు చేసే విషయంలో ఇరువురు న్యాయమూర్తులు భిన్నాభిప్రాయాలు వ్యక్తం చేశారు. దాంతో నిందితులను గృహనిర్బంధంలో ఉంచాలని ఆదేశించారు. అయిదుగురు సభ్యుల ధర్మాసనానికి ఈ కేసును అప్పగించారు. కాగా.. ఈ కేసు విచారణ సోమవారం ఉదయం 11 గంటలకు జరగాల్సి ఉంది.
ఇదీ చూడండి: రాజకీయ కేంద్ర దర్యాప్తు సంస్థ.. రాజ్యాంగ నైతికత ఏది?
