Gang rape: ఉత్తర్ప్రదేశ్లోని గోండా జిల్లాలో అత్యంత దారుణ ఘటన వెలుగు చూసింది. ఓ దళిత బాలికపై ఇద్దరు దుండగులు సామూహిక అత్యాచారానికి పాల్పడి ఆపై హత్య చేశారు. శుక్రవారం జరిగిన ఈ సంఘటనలో ఒకరిని అరెస్ట్ చేశారు పోలీసులు.
నవాబ్గంజ్ పోలీస్ స్టేషన్ పరిధిలోని ఓ గ్రామంలో ఈ దారుణం జరిగింది. శనివారం ఉదయం బాలిక మృతదేహాన్ని పంట పొలాల్లో కనుగొన్నారు స్థానికులు. శరీరంపై గాట్లు, తీవ్ర గాయాలను గుర్తించారు. వెంటనే పోలీసులకు సమాచారం అందించారు.
సమాచారం అందుకున్న జిల్లా కలెక్టర్ మార్కండేయా షాహి, ఎస్పీ సంతోష్ మిశ్రా.. సంఘటనా స్థలానికి చేరుకుని పరిశీలించారు. నిందితులను పట్టించిన వారికి రూ.25వేల బహుమతి ఇస్తామని ప్రకటించారు. కేవలం 5 గంటల్లోనే దుండగుల సమాచారం తెలుసుకున్నారు.
"నవాబ్గంజ్ పోలీస్ స్టేషన్ పరిధిలోని ఓ గ్రామంలో దళిత బాలికను అత్యాచారం చేసి హత్య చేశారు. ఇప్పటి వరకు ఒక నిందితుడ్ని పట్టుకున్నాం. మరొకరి కోసం గాలింపు కొనసాగుతోంది. "
- జిల్లా ఎస్పీ సంతోష్ మిశ్రా.
ఎన్కౌంటర్లో తూటా గాయాలు..
గ్రామం సమీపంలోని ఓ చెరకు తోటలో నిందితులు తలదాచుకున్నట్లు తెలుసుకుని చుట్టుముట్టారు పోలీసులు. ఈ క్రమంలో వారి నుంచి తప్పించుకునేందుకు నిందితులు కాల్పులు జరిపారు. పోలీసులు ఎదురు కాల్పులు జరపగా ఓ నిందితుడికి తూటాలు తగిలాయి. తీవ్రంగా గాయపడిన నిందితుడు మహేశ్ యాదవ్ను అదుపులోకి తీసుకున్నారు. మరొకరు పరారైనట్లు పోలీసులు తెలిపారు.
ఇదీ చూడండి: 'ఆయనతో సంబంధంపై పుస్తకం రాసేందుకు సిద్ధం'
