మహారాష్ట్రలో సవతి కుమారైపై అత్యాచారం చేసిన ఓ తండ్రికి.. ప్రత్యేక కోర్టు 20 ఏళ్ల జైలు శిక్షను విధించింది. ఈ దారుణం 2019లో జరగగా.. సుదీర్ఘ విచారణ అనంతరం న్యాయస్థానం ఈ మేరకు తీర్పు వెల్లడించింది. కానీ తన తండ్రిని క్షమించాలని.. జైలులో పెట్టొదని బాధితురాలే కోర్టును కోరడం అందర్నీ ఆశ్చర్యానికి గురిచేసింది. డీఎన్ఏ నివేదిక ఆధారంగా నిందితుడికి శిక్ష విధించినట్లు కోర్టు తెలిపింది.
వివరాల్లోకి వెళ్తే..
ముంబయిలో ఓ తండ్రి(41) తన మైనర్ సవతి కుమారైపై 2019 అక్టోబర్ నుంచి 2020 జూన్ వరకు లైంగికంగా వేధించాడు. దీంతో ఆ బాలిక గర్భం దాల్చింది. బాధితురాలు తన తల్లి సహాయంతో.. ఈ దారుణంపై పోలీసులకు ఫిర్యాదు చేసింది. పోలీసులు నిందితుడిపై పోక్సో చట్టం కింద కేసు నమోదు చేసి అరెస్ట్ చేశారు.
డీఎన్ఏ రిపోర్టే ఆధారం
బాలికకు వైద్య పరీక్షలు చేయగా అప్పటికే నాలుగు నెలల గర్భవతని గుర్తించారు. వెంటనే వైద్యులు దాన్ని కోర్టు అనుమతితో తొలగించారు. బాధితురాలు నుంచి సేకరించిన రక్తపు నమూనాలు నిందితుడి డీఎన్ఏతో పోలి ఉన్నందున.. ఆమె గర్భం దాల్చటానికి కారణం తండ్రే అని తేలింది. దీనిని ఘోరమైన నేరంగా పరిగణించిన కోర్టు నిందితుడికి.. 20 ఏళ్ల జైలు శిక్ష విధించింది.
ఆయన్ను క్షమించి వదిలేయండి..!
కేసు విచారణ సమయంలో తల్లి, కుమారై నిందితుడికి అనుకూలంగా మాట్లాడారు. ఎందుకంటే అతడే వారి కుటుంబానికి జీవనాధారం. అందుకే నిందితుడిని క్షమించి వదిలేయాలని బాధితురాలు, ఆమె తల్లి కోర్టును కోరారు. ఇద్దరూ అతడికి అనుకూలంగా వాదించినా.. దోషిని ఎలా శిక్షించకుండా ఉంటామని న్యాయస్థానం వారిని ప్రశ్నించింది.
