మేఘాలయ ఎన్నికల్లో కాన్రాడ్ సంగ్మా నేతృత్వంలోని నేషనల్ పీపుల్స్ పార్టీ(ఎన్పీపీ) 26 సీట్లలో విజయం సాధించి అతిపెద్ద పార్టీగా అవతరించింది. దీంతో ఇతర పార్టీల మద్దతుతో ప్రభుత్వ ఏర్పాటు చేసేందుకు కాన్రాడ్ సంగ్మా సిద్ధమవుతున్నారు. ఈ నేపథ్యంలో ముఖ్యమంత్రి పదవికి రాజీనామా చేశారు కాన్రాడ్ సంగ్మా. ఈ మేరకు రాజీనామా పత్రాన్ని మేఘాలయ గవర్నర్ ఫాగు చౌహాన్కు సమర్పించారు. ప్రభుత్వ ఏర్పాటుకు తమను ఆహ్వానించాలని గవర్నర్ను సంగ్మా కోరారు. సంగ్మా రాజీనామాను ఫాగు చౌహాన్ ఆమోదించారు. కొత్త ప్రభుత్వం కొలువుదీరే వరకు అపద్ధర్మ ముఖ్యమంత్రిగా కొనసాగాలని సంగ్మాను కోరారు గవర్నర్ ఫాగు చౌహాన్.
'ఎన్పీపీకి మద్దతు ఇచ్చేందుకు పలు పార్టీలు సిద్ధంగా ఉన్నాయి. 32 కంటే ఎక్కువ మంది ఎమ్మెల్యేలు ఎన్పీపీకి మద్దతు ఇస్తున్నారు. సంపూర్ణ మెజారిటీతో ప్రభుత్వాన్ని ఏర్పాటు చేయబోతున్నాం. ఇప్పటికే బీజేపీ మద్దతు తెలిపింది. కొత్త ప్రభుత్వ ఏర్పాటుకు మద్దతు ఇచ్చినందుకు బీజేపీకి సంగ్మా ధన్యవాదాలు' అని కాన్రాడ్ సంగ్మా విలేకర్లతో మాట్లాడారు.
సంగ్మాకు అభినందనలు: ప్రధాని మోదీ
మేఘాలయ ఎన్నికల్లో ఎన్పీపీ అద్భుతమైన పనితీరు కనబరిచిందని నరేంద్ర ప్రధాని మోదీ అన్నారు. ఈ సందర్భంగా ఎన్పీపీ అధ్యక్షుడు కాన్రాడ్ సంగ్మాను ప్రధాని అభినందించారు. రాష్ట్ర ప్రగతి కోసం ఆయనతో కలిసి పనిచేయడానికి తాను ఎదురుచూస్తున్నానని మోదీ అన్నారు. 'మేఘాలయ అసెంబ్లీ ఎన్నికల్లో కాన్రాడ్ సంగ్మా నేతృత్వంలోని ఎన్పీపీ అద్భుతంగా పనితీరు రాణించింది. కాన్రాడ్ సంగ్మాకు అభినందనలు. మేఘాలయ పురోగతి కోసం ఆయనతో కలిసి పనిచేయాలని ఎదురుచూస్తున్నాను' అని ప్రధాని నరేంద్ర మోదీ ట్వీట్ చేశారు.
హెచ్ఎస్పీడీపీ, పీడీఎఫ్, స్వతంత్రులు, బీజేపీ.. ఎన్పీపీకి మద్దతు ఇస్తున్నాయని మేఘాలయ బీజేపీ రాష్ట్ర అధ్యక్షుడు ఎర్నెస్ట్ మావ్రీ తెలిపారు. మార్చి 7న మేఘాలయలో కొత్త ప్రభుత్వం కొలువుదీరుతుందని ఆయన వెల్లడించారు. ముఖ్యమంత్రిగా కాన్రాడ్ సంగ్మా ఆ రోజే ప్రమాణ స్వీకారం చేస్తారని తెలిపారు. ఆ కార్యక్రమానికి ప్రధాని నరేంద్ర మోదీ హాజరవుతారని చెప్పారు.
మార్చి 2 న విడుదలైన ఫలితాల్లో మేఘాలయలో హంగ్ అసెంబ్లీ ఏర్పడింది. ప్రభుత్వ ఏర్పాటుకు అవసరమైన మెజార్టీ ఏ పార్టీకీ రాలేదు. అయితే.. మేఘాలయ ముఖ్యమంత్రి కాన్రాడ్ సంగ్మా నేతృత్వంలోని నేషనల్ పీపుల్స్ పార్టీ(ఎన్పీపీ) 26 సీట్లు సాధించి అతిపెద్ద పార్టీగా అవతరించింది. ఆ పార్టీకి బీజేపీ మద్దతు ప్రకటించింది.
మేఘాలయ ఎన్నికల ఫలితాలు..
- ఎన్పీపీ-26
- యూడీపీ-11
- కాంగ్రెస్-5
- టీఎంసీ-5
- భాజపా-2
- ఇతరులు-11
