వరకట్న దాహనానికి ఓ వివాహిత బలైపోయింది. ధనదాహంతో అత్తింటివారే హత్య చేసి.. తమ నేరాన్ని కప్పిపుచ్చేందుకు బాధితురాలిని నది ఒడ్డున పూడ్చిపెట్టారు. అంతటితో సంతృప్తి పడక బయటకు తీసి కాల్చేశారు. ఈ దుర్ఘటన బిహార్లోని భోజ్పుర్ జిల్లాలో వెలుగు చూసింది.
ఇదీ జరిగింది: ముఫాసిల్ పోలీస్ స్టేషన్ పరిధిలోని బరౌలీ గ్రామానికి చెందిన శత్రుఘ్న బింద్తో.. బభన్గామా గ్రామానికి చెందిన అఖిలేశ్ బింద్ కుమార్తె మమతా దేవికి 2021, మేలో వివాహం జరిగింది. పెళ్లి సమయంలో కొంత వరకట్నం ఇచ్చారు. కొద్ది రోజుల తర్వాత వ్యాపారం చేసేందుకు రూ.2 లక్షలు తేవాలని అత్తింటివారు వేధించటం ప్రారంభించారు. ఈ విషయాన్ని ఇటీవలే తల్లిదండ్రులకు తెలియజేసింది బాధితురాలు. ఆ తర్వాత ఆమె నుంచి ఎలాంటి ఫోన్ రాలేదు. అయితే, కుటుంబ ఆర్థిక పరిస్థితి సరిగా లేకపోవటం వల్ల వారి డిమాండ్ను తీర్చలేకపోయారు. గుజరాత్లోని రాజ్కోట్కు వలసవెళ్లి కూలీ పనులు చేసుకుంటూ జీవనం సాగిస్తున్నారు.
తాము అడిగిన కట్నం ఇవ్వలేదనే కోపంతో మమతా దేవిని హత్య చేసిన భర్త, అత్తింటివారు.. ఆధారాలు లేకుండా చేసేందుకు గుట్టుగా పూడ్చేయాలని నిర్ణయించారు. అందుకోసం ఓ కారును అద్దెకు తీసుకుని సరిపుర్ విశ్వన్పుర్ గ్రామం సమీపంలో నది ఒడ్డున పూడ్చేశారు. ఆ తర్వాత కారును పంపించేశారు. కానీ, వారు అంతటితో సంతృప్తి చెందలేదు. మృతదేహాన్ని బయటకు తీసి కాల్చేశారు.
కారు డ్రైవర్ను కొందరు గ్రామస్థులు పట్టుకుని విచారించగా.. అసలు విషయం బయటడింది. వెంటనే వారు బాధితురాలి కుటుంబ సభ్యులకు సమాచారం అందించారు. ముఫాసిల్ పోలీసులతో కలిసి వారు సంఘటనా స్థలానికి చేరుకునేలోపే.. 90 శాతం మేర మృతదేహం కాలిపోయింది. కేవలం ఎడమ కాలు మాత్రమే మిగిలింది. దాని ద్వారానే బాధితురాలిని గుర్తించారు. మిగిలిన కాలును పోలీస్ స్టేషన్కు తీసుకెళ్లాడు బాధితురాలి తండ్రి.
బాధితురాలి భర్త శత్రుఘ్న బింద్, మామ రామ్ ప్యార్ బింద్పై ముఫాసిల్ పోలీస్ స్టేషన్లో కేసు నమోదు చేశారు. బాధితురాలి కాలిని స్వాధీనం చేసుకున్న పోలీసులు.. డీఎన్ఏ, ఫొరెన్సిక్ పరీక్షల కోసం బిహార్ రాజధాని పట్నాకు పంపించారు. డ్రైవర్ను అదుపులోకి తీసుకున్నారు. హత్య వెనుక ఉన్న కారణాలను తెలుసుకునే ప్రయత్నం చేస్తున్నారు పోలీసులు.
ఇదీ చూడండి: అత్యాచార బాధితురాలిపై కిరోసిన్ పోసి నిప్పు.. అత్తింటివారి ఘాతుకం!
సెక్యూరిటీ గార్డును కొట్టి కట్టేసి.. పెట్రోల్ బంకుల్లో లక్షలు చోరీ
