ఉత్తర్ప్రదేశ్, హాపుడ్ జిల్లాలోని ధౌలానా పోలీస్ స్టేషన్ పరిధిలోని ఎలక్ట్రానిక్ వస్తువుల తయారీ పరిశ్రమలో ఘోర ప్రమాదం జరిగింది. బాయిలర్ పేలుడుతో పెద్ద ఎత్తున మంటలు అలుముకున్నాయి. ఈ దుర్ఘటనలో 13 మంది కార్మికులు ప్రాణాలు కోల్పోయారు. మరో 10 మంది తీవ్రంగా గాయపడినట్లు అధికారులు తెలిపారు. సమాచారం అందుకున్న అగ్నిమాపక విభాగం.. ఆరు అగ్నిమాపక యంత్రాలతో సంఘటనా స్థలానికి చేరుకుని మంటలను అదుపు చేసింది. పేలుడు ధాటికి పరిశ్రమ పూర్తిగా ధ్వంసమైంది. క్షతగాత్రులను ఆసుపత్రుల్లో చేర్పించినట్లు అధికారులు తెలిపారు. అందులో పలువురి ఆరోగ్య పరిస్థితి విషమంగా ఉన్నట్లు చెప్పారు.
సీఎం యోగి దిగ్భ్రాంతి: బాయిలర్ పేలు పలువురు కార్మికులు మృతి చెందిన ఘటనపై దిగ్భ్రాంతి వ్యక్తం చేశారు ముఖ్యమంత్రి యోగి ఆదిత్యనాథ్. సంఘటనా స్థలానికి చేరుకుని అవసరమైన సహాయక చర్యలు చేపట్టాలని అధికారులను ఆదేశించారు. సీఎం ఆదేశాలతో మీరట్ ఐజీ ప్రవీణ్ కుమార్, హాపుడ్ డీఎం సంఘటనాస్థలానికి చేరుకుని సహాయక చర్యలు చేపట్టారు.
"హాపుడ్లోని ఎలక్ట్రానిక్ వస్తువుల తయారీ పరిశ్రమలో బాయిలర్ పేలిన ఘటనలో మొత్తం 8 మంది మృతి చెందారు. మరో 15 మంది గాయపడ్డారు. క్షతగాత్రులను ఆశుపత్రులకు తరలించాం. కేసు నమోదు చేసుకుని దర్యాప్తు చేపట్టాం. బాధ్యులపై చర్యలు తీసుకుంటాం."
- ప్రవీణ్ కుమార్, హాపుడ్ ఐజీ.
కాగా, ఫ్యాక్టరీలో బాణసంచా తయారు చేశారని ఎఫ్ఐఆర్లో పోలీసులు పేర్కొన్నారు. ఈ ఘటనపై ఐపీసీ సెక్షన్ 286, 287, 304, 308, 337, 338 ప్రకారం కేసు నమోదు చేసుకున్నారు. మరోవైపు, కిసాన్ మజ్దూర్ సంఘ్ నేతలు ఘటనపై నిరసన వ్యక్తం చేస్తూ బైఠాయించారు. మృతుల కుటుంబాలకు రూ.కోటి చొప్పున పరిహారం ప్రకటించాలని డిమాండ్ చేశారు. చట్టవిరుద్ధంగా నడుస్తున్న ఫ్యాక్టరీలకు సీల్ వేయాలని కిసాన్ మజ్దూర్ సంఘ్ రాష్ట్ర అధ్యక్షుడు బ్రహ్మ సింగ్ రానా కోరారు.
ఇదీ చూడండి: డ్రగ్స్ కోసం డబ్బులు అడిగాడని యువకుడి దారుణ హత్య.. అందరి ముందే..!
