బిహార్ గంగానదిలో మృతదేహాలు తేలిన ఘటన మరువకముందే.. ఉత్తర్ప్రదేశ్లో మరొకటి వెలుగుచూసింది. ఉన్నావ్లోని గంగానది ఒడ్డున ఇసుకలో కుప్పలు తెప్పలుగా శవాలు బయటపడ్డాయి. ఈ మృతదేహాలన్నింటికీ ఒకే రకమైన(కాషాయ) వస్త్రం చుట్టి ఉండటం చర్చనీయాంశమైంది.
ఇవన్నీ గత నెలలో సంభవించిన కొవిడ్ మరణాలేనని స్థానికులు ఆరోపించగా.. వీటిపై ఇంకా ఎలాంటి స్పష్టత లేదని స్థానిక జిల్లా మేజిస్ట్రేట్ రవీంద్ర కుమార్ తెలిపారు.
"చనిపోయిన వారిని చాలా మంది దహనం చేస్తుండగా.. కొందరు మాత్రం ఇసుకలో పాతి పెడుతున్నారు. ఈ విషయం మా దృష్టికి రాగానే.. ఘటనా స్థలానికి అధికారుల్ని పంపాం. దీనిపై సమగ్ర విచారణ జరపాలని వారిని కోరాం. తదనుగుణంగా చర్యలు చేపడతాం."
- రవీంద్ర కుమార్, ఉన్నావ్ జిల్లా మేజిస్ట్రేట్
ఇదీ చదవండి: నీటిలో మృతదేహాలు.. వైరస్‌ సంక్రమిస్తుందా?
ఈ మృతదేహాలలో ఎక్కువగా.. హాజీపుర్లోని రౌతాపుర్ గంగా ఘాట్ వద్ద ఖననం చేసినట్టు తెలుస్తోంది. ఇవన్నీ ఒక్కసారిగా బయటపడటం వల్ల స్థానికుల్లో భయాందోళనలు నెలకొన్నాయి.
ప్రస్తుతం.. ఈ శవాలను వెలికితీస్తే శాంతిభద్రతల సమస్య తలెత్తుతుందని సీనియర్ అధికారి ఒకరు తెలిపారు. ఎలాంటి వివాదాలకు తావులేకుండా దీన్ని పరిష్కరించేందుకు చర్యలు చేపడతామన్నారు.
కరోనా మాహమ్మారి విజృంభణతో అక్కడ మరణాల సంఖ్య బాగా పెరిగిపోయింది. ఈ నేపథ్యంలో దహన సంస్కారాల ధరలు కూడా పెరిగాయి. ఈ ఖర్చులను భరించలేని ప్రజలు.. ఇలా మృతదేహాలను ఖననం చేస్తున్నారని స్థానికులు అంటున్నారు.
ఇదీ చదవండి: ఆదర్శ మహిళ- 3వేల కొవిడ్ శవాలకు అంత్యక్రియలు
