మహారాష్ట్రలో లాక్డౌన్పై ఆ రాష్ట్ర ముఖ్యమంత్రి ఉద్దవ్ ఠాక్రే.. ప్రభుత్వ అధికారులతో అత్యవసర వీడియో కాన్ఫరెన్స్ సమావేశం నిర్వహించారు. రాష్ట్ర ఆర్థిక రంగంపై అధిక ప్రభావం పడకుండా.. లాక్డౌన్ను ఎలా విధించాలో కార్యచరణ రూపొందించాలని అధికారులను ఆదేశించారు. ఈ సమావేశంలో మహారాష్ట్ర వైద్యశాఖ మంత్రి రాజేష్ తోపె సైతం పాల్గొన్నారు.
కొవిడ్-19 రోగుల కోసం పడకల సామర్థ్యం, ఆక్సిజన్, వైద్య సామాగ్రి.. తదితర అంశాలపై ఠాక్రే చర్చించారు. ఈ క్రమంలో రాష్ట్రంలో కరోనాను అరికట్టాలంటే కఠినమైన లాక్డౌన్ విధించాలని టాస్క్ ఫోర్స్.. ప్రభుత్వానికి సిఫార్సులు చేసింది. లాక్ డౌన్ విధించాక ప్రజల్లో ఎలాంటి గందరగోళం ఉండొద్దని సూచించారు ఠాక్రే.
కఠిన ఆంక్షలు
గత వారం నుంచి మహారాష్ట్రలో కరోనా కేసులు భారీగా పెరిగాయి. వారం రోజుల్లోనే లక్షమందికి కరోనా నిర్ధరణ కావటం కలకలం రేపుతోంది. కరోనాను కట్టడి చేసేందుకు రాష్ట్రంలో 144 సెక్షన్ విధించింది ప్రభుత్వం. ఐదుగురి కంటే ఎక్కువ మంది గుమిగూడటాన్ని నిషేధించింది. కొవిడ్ కట్టడిలో భాగంగా ఇప్పటికే పండుగలు, శుభకార్యాలతో పాటు.. రాజకీయ, మతపరమైన ర్యాలీలు, కార్యక్రమాలను నిర్వహించరాదని స్పష్టం చేసింది.
మహారాష్ట్రలో ఆదివారం కొత్తగా 35,726 కేసులు నమోదయ్యాయి.
ఇదీ చదవండి : 'మహా' కరోనా కేసుల్లో సరికొత్త రికార్డు
