Ludhiana court blast: పంజాబ్లోని లుథియానా జిల్లా కోర్టులో జరిగిన బాంబు పేలుడు ఘటనలో సంచనల విషయాలు వెలుగులోకి వస్తున్నాయి. ఈ ఘటనలో ప్రాణాలు కోల్పోయిన వ్యక్తిని.. 2019లో ఓ డ్రగ్స్ కేసుకు సంబంధించి డిస్మస్ అయిన హెడ్ కానిస్టేబుల్ గగన్దీప్ సింగ్గా గుర్తించారు పోలీసులు. ఘటనాస్థలంలో మొబైల్ సిమ్కార్డు, వైర్లెస్ డాంగిల్ను స్వాధీనం చేసుకుని, సిమ్ ఆధారంగా గగన్దీప్ను గుర్తించారు. అయితే, తనపై నమోదైన డ్రగ్స్ కేసులో రికార్డులను నాశనం చేసేందుకే గగన్దీప్ ఈ పేలుడుకు పాల్పడినట్లు విశ్వసనీయ వర్గాలు వెల్లడించాయి.
లుథియానాలోని ఖన్నా ప్రాంతానికి చెందిన గగన్దీప్ను మాదకద్రవ్యాల అక్రమ రవాణా కేసులో 2019లో విధుల నుంచి తొలగించారు. ఆ తర్వాత పోలీసులు అతడిని అరెస్ట్ చేశారు. రెండేళ్ల పాటు జైల్లో ఉన్న గగన్దీప్.. ఈ ఏడాది సెప్టెంబర్లో బెయిల్పై విడుదలయ్యాడు. కేసు విచారణలో భాగంగా కోర్టుకు హాజరుకావాల్సి ఉంది. ఈ క్రమంలోనే కేసు నుంచి బయటపడేందుకు ఈ కుట్ర పన్నినట్లు అధికార వర్గాలు భావిస్తున్నాయి. కేసుకు సంబంధించిన పేపర్లను భద్రపరిచే కోర్టు రికార్డు గదిని బాంబుతో పేల్చేయాలని ప్రణాళిక చేసుకున్న గగన్దీప్.. మూత్రశాలలో బాంబును అమర్చుతుండగా ఒక్కసారిగా పేలిపోయింది.
దాడి వెనక వారి హస్తం..
లుథియానా కోర్టు పేలుడు ప్రాథమిక విచారణలో కీలక విషయాలు వెలుగులోకి వచ్చినట్లు చెప్పారు పంజాబ్ డీజీపీ సిద్ధార్థ్ ఛటోపాధ్యాయ. బాంబును బిగించి మరో ప్రాంతంలో అమర్చేందుకే వాష్రూమ్లోకి మాజీ హెడ్ కానిస్టేబుల్ వెళ్లినట్లు తెలిసిందన్నారు. బాంబు పేలిపోయినప్పుడు గగన్దీప్ ఒక్కడే మూత్రశాలలో ఉన్నాడని తెలిపారు. దీనితో ఖలిస్థానీ ఉగ్రవాదులు, డ్రగ్స్ స్మగ్లర్లు, మాఫియాకు సంబంధాలు ఉన్నాయని భావిస్తున్నట్లు చెప్పారు.
" పేలుడుకు వాడిన పదార్థాలను తెలుసుకునేందుకు ఫోరెన్సిక్ ల్యాబ్కి నమూనాలు పంపించాం. నివేదిక తర్వాతే ఆర్డీఎక్స్ వాడారా లేదా అనేది తెలుస్తుంది. ఇప్పుడు దానిపై స్పష్టత ఇవ్వలేము. గగన్దీప్ విధుల్లో ఉన్నప్పుడు సాంకేతికంగా నైపుణ్యం ఉంది. కంప్యూటర్లు, సాంకేతిక పరికరాలను నిర్వహించటంలో మంచి పనితీరు కనబరిచాడు. ఈ ఘటనను మానవ బాంబుగా పరిగణించలేం. కొన్ని తీగలను కలిపి.. వేరే చోట బాంబును పెట్టాలనే ఉద్దేశంతోనే అతను వాష్రూమ్కి వెళ్లినట్లు తెలుస్తోంది. అతను కాలకృత్యాల కోసం మూత్రశాలను వినియోగించుకోలేదు, బాంబును బిగించేందుకు వాష్రూమ్ను వినియోగించుకున్నాడు. "
- సిద్ధార్థ్ ఛటోపాధ్యాయ, పంజాబ్ డీజీపీ
పేలుడులో మృతి చెందిన వ్యక్తిని కేవలం 24 గంటల్లోనే గుర్తించిన పోలీసులను, ఇతర దర్యాప్తు సంస్థల పనితీరును కొనియాడారు డీజీపీ. గగన్దీప్ను గుర్తించటంలో మొబైల్ సిమ్ కార్డు సాయపడినట్లు తెలిసిందన్నారు. పంజాబ్ అసెంబ్లీ ఎన్నికల నేపథ్యంలో కొన్ని బయటి శక్తులు రాష్ట్రంలో శాంతిభద్రతలకు విఘాతం కలిగించేందుకు ప్రయత్నిస్తున్నాయని, వారిని విజయవంతం కాబోనివ్వమని, ప్రజలు ఆందోళన చెందవద్దని సూచించారు. రాష్ట్రంలో నార్కో టెర్రరిసమ్ పెరిగిపోయిందని, ఈ బ్లాస్ట్ వెనక వారి హస్తం ఉందన్నారు. పంజాబ్ పోలీసులు, ముఖ్యంగా ఎస్టీఎఫ్ బృందాలు వారిని కట్టడి చేయాలన్నారు.
ఇదీ చూడండి: Ludhiana Bomb Blast: లుథియానా బాంబు పేలుళ్ల మృతుడు.. మాజీ పోలీసు
