కరోనా కట్టడికి విధించిన లాక్డౌన్తో వ్యాపారస్థులపై తీవ్ర ప్రభావం పడింది. ఈ సమయంలో కొందరు సరికొత్త దారులు వెతుకుతూ అందరి దృష్టినీ ఆకర్షిస్తున్నారు. అలాంటి కోవకే చెందుతారు తొట్టుముక్కాం ప్రాంతానికి చెందిన టిన్స్ ఎం.థామస్. తనక నైపుణ్యంతో విల్లు, బాణాలను ఎంతో అందంగా తీర్చిదిద్దుతూ ఔరా అనిపిస్తున్నాడు. అంతకుముందు.. ఈ పనిలో కొద్దిపాటి ప్రావీణ్యమున్న థామస్.. లాక్డౌన్ సమయంలో తన కళకు మరింత పదును పెట్టాడు.
'బాహుబలి' సినిమాతో మళ్లీ..
కరోనా వ్యాప్తితో గతేడాదిలోనే థామస్ వ్యాపారం మందగించింది. ఈ సమయంలో లాక్డౌన్ విధించడం వల్ల.. ఇంటికే పరిమితమయ్యాడు. ఆ సమయంలో 'పఝాస్సీ రాజా', 'బాహుబలి' వంటి సినిమాలు చూశాడట. అందులో వాడే విల్లు, బాణాలను బాగా పరిశీలించి.. తానూ వాటిని తయారు చేయాలనుకున్నాడు థామస్. ఈ క్రమంలో వాటిని రూపొందిస్తూ చాలాసార్లు విఫలమయ్యాడు. అలాగని అంతటితో ఆగలేదు. ఎలాగైనా దానిపై పట్టు సాధించాలనే దృఢ నిశ్చయంతో.. యూట్యూబ్ ఛానళ్లను చూసి తన ప్రతిభకు సానపెట్టాడు. అలా.. అనేక ప్రయత్నాల తర్వాత ఎట్టకేలకు విజయవంతమయ్యాడు. ఇప్పుడు రకరకాల విల్లులు, బాణాలను అలవోకగా చేసేస్తూ అబ్బురపరుస్తున్నాడీ యువకుడు.
ఇదీ చదవండి: అసాధారణ ప్రతిభతో నాలుగేళ్లకే 'గూగుల్ గర్ల్'!
థామస్ చేసే పలు రకాల బాణాలివే..
గిరిజన ప్రజలు వేట కోసం ఉపయోగించే విల్లంబులు, బాణాలనూ ఎంతో నేర్పుగా రూపొందిస్తున్నాడు థామస్. 3 లేదా 4 బాణాలను ఒకేసారి వదిలే 'ఓతాంబు(ఓతులి)', 'పరంకి పాతి'లనూ తయారుచేస్తున్నాడు. ఫిషింగ్ గన్ అని పిలిచే 'తోక్కు తెట్టాలీ' రకం విల్లంబులను కూడా ఇట్టే చేసేస్తున్నాడు. ఇతడు రూపొందించిన వాటిలో 'ఫోల్డబుల్(మడిచేందుకు వీలుగా)' విల్లు కూడా ఉంది. దాన్ని మూడు భాగాలుగా మడిచి.. ఎక్కడికైనా సులువుగా తీసుకెళ్లవచ్చు.
విలు విద్యను అభ్యసించి..
వృత్తిపరంగా విలు విద్యను ఎంచుకున్న వారి కోసం.. విల్లులు, బాణాలను తయారు చేయడం ప్రారంభించాను అంటున్నాడు టిన్స్. అంతటితో ఆగకుండా.. మరో అడుగు ముందుకేసి తానూ విలు విద్యను నేర్చేసుకున్నాడు. ఫలితంగా.. అతడు తయారు చేసే ప్రతి విల్లు, బాణాలను మరింత కచ్చితత్వం, పరిపూర్ణతతో పరీక్షించగలుగుతున్నాడు. తాను నేర్చుకున్న ఈ విలువిద్యతో సుమారు 30 నుంచి 50 మీటర్ల దూరంలోని లక్ష్యాలను ఎంతో కచ్చితంగా ఛేదిస్తూ.. అందరితో శెభాష్ అనిపించుకున్నాడు.
ఇదీ చదవండి: ప్రోగ్రామింగ్ను ఆటాడుకుంటున్న ఏడేళ్ల బుడతడు!
ఉపయోగించే సామగ్రి?
విల్లంబులు, బాణాల కోసం థామస్.. మహోగని, అరేకా నట్ పామ్, వెదురు కలపలను ఉపయోగిస్తున్నాడు. బాణాల్ని వదిలేచోట(ట్రిగర్) మాత్రం.. గేదె కొమ్ములతో తయారైన వస్తువుల్ని వినియోగిస్తానంటున్నాడు. ఇలా ఒక్కో విల్లు రూపొందించేందుకు సుమారు 3-4 రోజుల సమయం పడుతుందని ఈ విలువిద్య కళాకారుడు చెప్పుకొచ్చాడు. విల్లు, బాణంతో కూడిన ఒక సెట్ ధర సుమారు రూ.2,000 నుంచి రూ.15,000 వరకూ ఉంటుంది.
నిబంధనలకు లోబడి..
థామస్ ఎంతో ప్రతిభా నైపుణ్యాలను కలగలిపి తయారుచేసిన విల్లంబులు సోషల్ మీడియా ప్లాట్ఫామ్లలోనూ మంచి ప్రాచుర్యం పొందాయి. అయితే.. ఎంత డిమాండ్ ఉన్నా.. అనవసరంగా ఎవరికీ విల్లు, బాణాలను విక్రయించనని తాను విధించుకున్న నిబంధనలకు కట్టుబడి ఉంటానంటున్నాడు టిన్స్.
ఇదీ చదవండి: బాలుడి అద్భుత బ్యాటింగ్కు ఐపీఎల్ ఫ్రాంఛైజీ ఫిదా
