Lakshadweep: 15-18 ఏళ్ల వారిలో అర్హులైన చిన్నారులకు 100 శాతం వ్యాక్సినేషన్ పూర్తిచేసింది లక్షద్వీప్. రాష్ట్రాలు, కేంద్రపాలిత ప్రాంతాల్లో ఈ ఘనత సాధించిన తొలి ప్రాంతంగా నిలిచింది. ఈ మేరకు జిల్లా కలెక్టర్, సెక్రటరీ ఎస్. అస్గర్ అలీ మంగళవారం వెల్లడించారు.
కరోనాను అరికట్టేందుకు టీనేజర్లకు టీకా పంపిణీ కార్యక్రమం దేశవ్యాప్తంగా జనవరి 3న ప్రారంభమైంది. అందులో భాగంగా 3492 మంది చిన్నారులకు వారం రోజుల్లోనే టీకా పంపిణీ చేసింది లక్షద్వీప్. అంతేకాకుండా, ఐసీఎంఆర్ నిబంధనల ప్రకారం, ఫ్రంట్లైన్ వర్కర్స్, ఆరోగ్య సిబ్బంది, 60 ఏళ్ల పైబడినవారికి బూస్టర్ డోసులను అందిస్తోంది.
అంతకుముందు.. రాష్ట్రాలు, కేంద్రపాలిత ప్రాంతాల్లో ఆరోగ్య సిబ్బంది, ఫ్రంట్లైన్ వర్కర్స్, 18 ఏళ్ల పైబడినవారికి 100 శాతం టీకా పంపిణీ చేసిన తొలి ప్రాంతంగానూ గుర్తింపు పొందింది లక్షద్వీప్. కరోనా కట్టడికి తగిన జాగ్రత్తలు తీసుకుంటూనే థర్డ్ వేవ్ను ఎదుర్కొనడానికి సిద్ధమవుతోంది.
ఇదీ చూడండి: మహారాష్ట్రలో కరోనా విలయం.. ఆ రాష్ట్రాల్లో 20వేలకుపైగా కేసులు
