కేరళ ఉన్నత విద్యాశాఖ మంత్రి కేటీ జలీల్ మంగళవారం తన పదవికి రాజీనామా చేశారు. ఆయనపై అధికార దుర్వినియోగం, బంధుప్రీతి అభియోగాలను రాష్ట్ర లోకాయుక్త ఇటీవలే నిర్ధరించింది. ఆయన పదవిలో కొనసాగరాదని ఆదేశిస్తూ ఈ నెల 9న సీఎం పినరయ్ విజయన్కు నివేదిక సమర్పించింది. దీంతో తన రాజీనామాను విజయన్కు పంపించారు జలీల్. వెంటనే సీఎం ఆ లేఖను గవర్నర్ ఆమోదం కోసం పంపినట్టు విశ్వసనీయ వర్గాల సమాచారం.
రాజీనామా విషయాన్ని ఫేస్బుక్ ద్వారా వెల్లడించిన జలీల్.. దీంతో తనపై ప్రతీకారం తీర్చుకోవాలనుకున్న వారికి ఉపశమనం దక్కిందని వ్యాఖ్యానించారు. రెండేళ్లుగా మీడియా తనపై దాడి చేస్తోందని ఆరోపించారు.
ఇంతకుముందూ..
ఎల్డీఎఫ్ మంత్రివర్గం నుంచి బంధుప్రీతి అభియోగాలపై రాజీనామా చేసిన రెండో మంత్రి జలీల్. అంతకుముందు 2016లో నిబంధనలు ఉల్లంఘించి కేరళ ఇండస్ట్రీస్ ఎంటర్ప్రైజెస్ లిమిటెడ్కు మేనేజింగ్ డైరెక్టర్గా తన బంధువును నియమించిన వ్యవహారంలో పరిశ్రమల శాఖ మంత్రి ఈపీ రంజన్ రాజీనామా చేశారు. రెండేళ్ల తర్వాత తిరిగి ఆయనను మంత్రివర్గంలోకి తీసుకోవడం గమనార్హం.
ఇదీ చూడండి: మంగళూరు తీరంలో పడవ ప్రమాదం- ముగ్గురు మృతి
