ఈ-కామర్స్ సైట్లలో ఆర్డర్ చేసిన వస్తువుల స్థానంలో కస్టమర్లకు వేరే వస్తువులు అందుతున్న ఘటనలు అప్పుడప్పుడు జరుగుతుంటాయి. ఇటీవల కేరళకు చెందిన ఓ వ్యక్తి రూ.70వేలు విలువ చేసే ఐఫోన్ 12ను ఆర్డర్ పెడితే అతడికి ఓ విమ్ సబ్బు, రూ.5 నాణెం వచ్చాయి. ఇప్పుడు అదే రాష్ట్రానికి చెందిన మరో వ్యక్తికి కూడా ఈ-కామర్స్ సైట్ ద్వారా వింత అనుభవం ఎదురైంది. పాస్పోర్ట్ పెట్టుకునేందుకు ఓ కవర్ కోసం ఆర్డర్ పెడితే.. ఆ కవర్తో పాటు ఓ పాస్పోర్ట్ కూడా వచ్చింది. వింతగా ఉంది కదూ.. ఈ ఘటన వయనాడ్ జిల్లా కనియమ్బెట్టాలో జరిగింది.
కవర్లో పాస్పోర్ట్..
మిథున్ బాబు గత నెల 30న అమెజాన్లో ఓ పాస్పోర్ట్ కవర్ను ఆర్డర్ చేశాడు. ఈ నెల 1న అతడి ఆర్డర్ డెలివరీ అయింది. పార్సెల్ ఓపెన్ చేసి చూస్తే అందులో మరో వ్యక్తికి చెందిన పాస్పోర్ట్ కూడా ఉంది. వెంటనే అతను కస్టమర్ కేర్కు కాల్ చేశాడు. అయితే వారు ఇచ్చిన సమాధానంతో ఆశ్చర్యపోవడం మిథున్ వంతైంది. ఈ తప్పిదం మరోసారి జరగదని.. విక్రయదారుడికి దీనిపై హెచ్చరిస్తామంటూ చెప్పి ఫోన్ పెట్టేశారు.
దీంతో ఆ పాస్పోర్ట్ను సంబంధిత వ్యక్తికి చేరవేసేందుకు మిథున్ ప్రయత్నాలు మొదలు పెట్టాడు. ఆ పాస్పోర్ట్లోని వివరాల ప్రకారం అది త్రిస్సూర్కు చెందిన మహ్మద్ సాలిహ్కు చెందినది. పాస్పోర్ట్లో ఫోన్ నెంబర్ వంటి వివరాలు లేకపోయినా మిథున్.. చివరకు సాలిహ్ వివరాలు సేకరించి అతడిని సంప్రదించాడు. త్వరలోనే అతనికి పాస్పోర్ట్ అందించనున్నాడు.
పాస్పోర్ట్ అలా వచ్చింది..
తన కంటే ముందుగా ఆ కవర్ను సాలిహ్ ఆర్డర్ చేసి ఉంటాడని.. అందులో తన పాస్పోర్ట్ పెట్టి సరిచూసుకొని అది నచ్చకపోవడం వల్ల దానిని రిటర్న్ చేశాడని మిథున్ పేర్కొన్నాడు. రిటర్న్ చేస్తున్న క్రమంలో ఆ కవర్లో నుంచి తన పాస్పోర్ట్ తీయడం మర్చిపోయి ఉండొచ్చని తెలిపాడు. రిటర్న్ అయిన ఆ కవర్ను సరిగ్గా పరిశీలించకుండా ఆ విక్రయదారుడు మరో ఆర్డర్ వస్తే అమ్మేశాడని చెప్పాడు.
ఇదీ చూడండి : 'గంగిరెద్దుకు క్యూఆర్ కోడ్.. ఇదీ డిజిటల్ విప్లవం అంటే!'
