కొత్తగా కొలువుదీరిన ప్రధాని నరేంద్ర మోదీ కేబినెట్లో చోటు దక్కిన వారిలో మధ్యప్రదేశ్కు చెందిన కీలక నేత జ్యోతిరాదిత్య సింధియా, బిహార్కు చెందిన ఎల్జేపీ ఎంపీ పశుపతి కుమార్ పరాస్ ఉన్నారు. కేంద్ర మంత్రివర్గంలోకి రాకముందు వీరు తమ రాష్ట్రాల్లో రాజకీయ ప్రకంపనలు సృష్టించారు. వీరు తీసుకున్న నిర్ణయాలు దేశవ్యాప్తంగా చర్చనీయాంశమయ్యాయి.
సింధియా తిరుగుబావుటా..
మధ్యప్రదేశ్లో భాజపా అధికారం చేజిక్కించుకుందంటే అది జ్యోతిరాదిత్య సింధియా వల్లే సాధ్యమైంది. 2018 అసెంబ్లీ ఎన్నికల్లో మొత్తం 230 సీట్లకు గాను 114 స్థానాలు గెలిచి ఇతరుల మద్దతుతో అధికారంలోకి వచ్చిన కాంగ్రెస్పై తిరుగుబావుటా ఎగురవేసి సంచలనం సృష్టించారు సింధియా. గ్వాలియర్ రాజవంశస్థుడైన ఆయనకు రాష్ట్రవ్యాప్తంగా మంచి ఆదరణ ఉంది. హస్తం పార్టీపై అసంతృప్తితో తన అనుచరణ గణం 25 మంది ఎమ్మెల్యేలతో కలిసి మార్చి 2020లో భాజపాలో చేరారు. ఫలితంగా అధికార కాంగ్రెస్ ప్రభుత్వం కుప్పకూలింది. అనంతరం జరిగిన ఉప ఎన్నికల్లో భాజపా తరఫున పోటీ చేసిన తన అనుచరుల్లో చాలా మందిని సింధియా గెలిపించుకున్నారు. దీంతో అప్పటి వరకు ఉన్న భాజపా బలం 107 నుంచి 126కి పెరిగింది. ఫలితంగా మధ్యప్రదేశ్లో తిరుగులేని అధికారాన్ని కైవసం చేసుకుంది.
అయితే గుణ నియోజకవర్గం నుంచి వరుసగా నాలుగు సార్లు ఎంపీగా గెలిచిన సింధియా.. 2019లో జరిగిన లోక్‌సభ ఎన్నికల్లో మాత్రం తన చిరకాల ప్రత్యర్థి, భాజపా అభ్యర్థి కృష్ణపాల్‌ సింగ్‌ యాదవ్ చేతిలో పరాజయం పాలయ్యారు. 2020లో కాంగ్రెస్ను వీడి భాజపాలో చేరిన తర్వాత సింధియాకు రాజ్యసభ ఎంపీగా అవకాశం దక్కింది. ఇప్పుడు మోదీ మంత్రివర్గంలో చోటు లభించింది. సింధియాకు కేంద్రమంత్రి పదవి దక్కుతుందని ఎప్పటి నుంచో ప్రచారం జరుగుతోంది.
బిహార్లో సంచలనం..
బిహార్ ఎన్నికలకు ముందు ఎల్జేపీ అధినేత రామ్‌విలాస్‌ పాసవాన్‌ చనిపోగానే.. ఆయన కుమారుడు చిరాగ్ పాసవాన్‌ పార్టీ పగ్గాలు చేపట్టారు. అయితే ఇటీవల ఎల్జేపీ నూతన అధ్యక్షుడిని తానే అని ప్రకటించి రాష్ట్ర రాజకీయాల్లో సంచలనం సృష్టించారు పశుపతి కుమార్ పరాస్. పార్టీ పీఠం నుంచి చిరాగ్ను తొలగించి దేశవ్యాప్తంగా చర్చనీయాంశమయ్యారు. చిరాగ్ మినహా పార్టీలో ఉన్న మిగతా ఐదుగురు ఎంపీలు పశుపతి పరాస్కు మద్దుతుగా నిలిచారు. లోక్‌సభలో పశుపతి వర్గాన్ని గుర్తిస్తున్నట్లు లోక్‌సభ సచివాలయం కూడా అధికారికంగా ప్రకటించింది. దీంతో చిరాగ్ ఏకాకి అయ్యారు.
ఇదీ చూడండి: ఎల్జేపీపై పట్టుకు నేతల ఎత్తులు
అయితే భాజపా అధిష్ఠానంతో ముందుగానే చర్చించి కేంద్రమంత్రి వర్గంలో బెర్తు ఖరారు చేసుకున్నాకే పశుపతి పరాస్ ఎల్జేపీలో తిరుగుబావుటా ఎగురవేశారని ప్రచారం జరిగింది. జేడీయూ అధినేత, బిహార్ సీఎం నితీశ్ కుమార్ పాత్ర కూడా ఉందని జోరుగా వార్తలొచ్చాయి.
ఇప్పుడు ఆ ఊహాగానాలే నిజమయ్యాయి. మోదీ నూతన కేబినెట్లో పశుపతి పరాస్కు చోటు దక్కింది. 71 సంవత్సరాల పశుపతి ఆరుసార్లు ఎమ్మెల్యేగా కూడా ఎన్నికయ్యారు.
భాజపా, దాని మిత్రపక్షాల నుంచి మొత్తం 43 మందికి కేంద్రమంత్రులుగా అవకాశం దక్కింది. వచ్చే ఏడాది ఉత్తర్ప్రదేశ్, ఉత్తరాఖండ్, హిమాచల్ప్రదేశ్, గోవా, పంజాబ్, గుజరాత్ రాష్ట్రాల్లో అసెంబ్లీ ఎన్నికలు జరగనున్న నేపథ్యంలో మోదీ కేబినెట్లో ఆయా రాష్ట్రాల నేతలకు సముచిత స్థానం కల్పించారు.
మంత్రి వర్గ విస్తరణలో జోతిరాదిత్య సింధియా, పశుపతి పరాస్తో పాటు భూపేందర్ యాదవ్, అనుప్రియ పటేల్, మీనాక్షీ లేఖీ, అజయ్ భట్, అనురాగ్ ఠాకూర్ వంటి నేతలకు అవకాశం దక్కింది.
