ఒడిశాలోని నవరంగ్పుర్లో దొంగలు రెచ్చిపోయారు. శుక్రవారం రథయాత్ర సందర్భంగా సెలవును అదనుగా తీసుకుని స్థానిక పాఠశాలలోకి చొరబడి కంప్యూటర్లు తదితర సామగ్రిని దోచుకెళ్లారు. అంతటితో ఆగకుండా తరగతి గదుల బ్లాక్బోర్డులపై 'ధూమ్-4 త్వరలోనే రాబోతుంది' అంటూ రాశారు. శనివారం ఉదయం పాఠశాలకు వచ్చి అది చూసిన ఉపాధ్యాయులు అవాక్కై.. పోలీసులకు ఫిర్యాదు చేశారు.
అసలేం జరిగిందంటే?.. శుక్రవారం పూరీ జగన్నాథుని రథయాత్ర సందర్భంగా ఒడిశా ప్రభుత్వం రాష్ట్రవ్యాప్తంగా పాఠశాలలకు సెలవు ప్రకటించింది. ఈ నేపథ్యంలోనే శనివారం ఉదయం నవరంగ్పుర్ పాఠశాలకు ఉపాధ్యాయులు రాగా.. బయట తలుపులకు వేసి ఉన్న తాళాలు పగిలి ఉండడం గమనించారు. లోపలకి వెళ్లి ప్రిన్సిపల్ గది చూసేసరికి కంప్యూటర్లు, జిరాక్స్ యంత్రాలు కనిపించలేదు. సౌండ్ బాక్సులు సహా పలు సామాన్లు చోరీకి గురయ్యాయి. ఆ తర్వాత పక్కనే ఉన్న తరగతి గదుల బ్లాక్బోర్డులపై దొంగలు రాసింది చూసి అందరూ అవాక్కయ్యారు. 'త్వరలోనే ధూమ్-4 రాబోతుంద'ని దొంగలు బోర్డు మీద రాశారు.
అయితే దొంగలు ఎత్తుకెళ్లిన కంప్యూటర్లలో విద్యార్థులకు సంబంధించిన అన్ని వివరాలు, పరీక్ష పేపర్లు, పాఠశాల సమాచారం ఉందని ప్రిన్సిపల్ తెలిపారు. పాఠశాల యాజమాన్యం ఖతీగూడ పోలీస్స్టేషన్‌లో ఫిర్యాదు చేసింది. కేసు నమోదు చేసుకున్న ఖతీగూడ పోలీసులు.. సైంటిఫిక్ టీమ్, డాగ్ స్క్వాడ్ సహాయంతో దర్యాప్తు చేపడుతున్నారు. గతంలో నందహండి బ్లాక్‌లోని దహన్‌ స్కూల్ ఆఫీసు రూమ్లో ఉన్న కంప్యూటర్లను దొంగలు దోచుకెళ్లారు. ఆ తర్వాత బ్లాక్‌బోర్డ్‌పై కొన్ని మొబైల్ నంబర్లు కూడా రాశారు. వాటిలో ఆ పాఠశాలలోనే విధులు నిర్వర్తిస్తున్న ఉపాధ్యాయుడి ఫోన్ నెంబర్ కూడా ఉంది. అది చూసిన పాఠశాల ఉపాధ్యాయులు ఒక్కసారిగా షాకయ్యారు.
ఇవీ చదవండి: 'ఐదు రూపాయల డాక్టర్'.. పెద్దాసుపత్రిలో నయంకాని రోగాలూ మాయం!
