చైనాతో ఉన్న వాస్తవాధీన రేఖ(ఎల్ఏసీ)(Line Of Actual Control) వెంబడి నిర్దిష్ట ప్రాంతాల్లో రోడ్డు, నడక మార్గాలను నిర్మించడానికి తన ప్రత్యేక ఇంజినీరింగ్‌ విభాగాన్ని నియోగించాలని భారత్- టిబెట్‌ సరిహద్దు పోలీసు దళం(ఐటీబీపీ)(Itbp Latest News) తొలిసారిగా నిర్ణయించింది. తద్వారా లద్దాఖ్, అరుణాచల్‌ ప్రదేశ్‌లలోని తన శిబిరాలకు చేరుకునేందుకు ఉద్దేశించిన అనుసంధాన ప్రాజెక్టులను వేగంగా పూర్తి చేయాలని భావిస్తోంది. ఈ ప్రతిపాదనకు కేంద్ర హోంశాఖ ఆమోదం తెలిపింది. తూర్పు లద్దాఖ్‌లో చైనాతో సైనిక ప్రతిష్టంభన నేవథ్యంలో ఈ నిర్ణయానికి ప్రాధాన్యం ఏర్పడింది.
భారత్-చైనా సరిహద్దు రోడ్ల ప్రాజెక్టుల్లోని రెండో దశలో 32 రోడ్లకుగాను నాలుగింటిని, ప్రభుత్వం మంజూరు చేసిన 18 నడక మార్గాల్లో రెండింటిని నిర్మించే బాధ్యతను ఐటీబీపీ(Itbp Latest News) చేపట్టిందని అధికారులు తెలిపారు. లద్దాఖ్ ప్రాంతంలో ఎల్ఏసీ వెంబడి ఉన్న రోడ్లలో ఒకటి నుంచి రెండు కిలోమీటర్ల పొడవైన మార్గాల బాధ్యతను తీసుకున్నట్లు పేర్కొన్నారు. నడక మార్గాలు అరుణాచల్‌ ప్రదేశ్‌ ప్రాంతంలో ఉన్నాయని వివరించారు. పదాతి దళాల గస్తీకి వీటిని ఉపయోగిస్తున్నట్లు తెలిపారు. సాధారణంగా ఈ ప్రాంతాల్లో రోడ్ల నిర్మాణ బాధ్యతలను సరిహద్దు రోడ్ల సంస్థ(బీఆర్‌వో), కేంద్ర ప్రజా పనుల విభాగం(సీపీడబ్యూడీ) చేపడుతుంటాయి. అయితే వీటిని వేగవంతం చేసే ఉద్దేశంతోనే తమ ఇంజినీరింగ్‌ విభాగాన్ని రంగంలోకి దించినట్లు ఐటీబీపీ అధికారులు పేర్కొన్నారు.
ఇవీ చూడండి:
