దేశంలోకి డ్రగ్స్ను తరలించేందుకు ప్రయత్నించిన ఓ పడవను భారత కోస్టు గార్డు (ఐసీజీ) సిబ్బంది అడ్డుకున్నారు. ఇరాన్కు చెందిన ఆ బోటులో ఉన్న ఐదుగురిని అదుపులోకి తీసుకున్నారు. అరేబియా సముద్రం మీదుగా వచ్చిన వీరంతా.. గుజరాత్లోని కచ్ జిల్లాలో ఉన్న ఓఖా తీరానికి దగ్గర్లో పట్టుబడ్డారు. బోటులో 61 కేజీల హెరాయిన్ను వీరు తీసుకొస్తున్నట్లు అధికారులు వెల్లడించారు. ఈ హెరాయిన్ విలువ అంతర్జాతీయ మార్కెట్లో రూ.425 కోట్లు ఉంటుందని చెప్పారు. తమకు నిఘా వర్గాల నుంచి అందిన కచ్చితమైన సమాచారం ప్రకారం ఈ ఆపరేషన్ నిర్వహించామని రక్షణ శాఖ ప్రజా సమాచార విభాగం ఓ ప్రకటనలో తెలిపింది. డ్రగ్స్ రవాణా గురించి గుజరాత్ యాంటీ టెర్రర్ స్క్వాడ్ సమాచారం ఇచ్చిందని పేర్కొంది. దీంతో కోస్టు గార్డు అధికారులు వెంటనే స్పందించారని తెలిపింది. రెండు ఫాస్ట్ పెట్రోల్ క్లాస్ షిప్లను పెట్రోలింగ్ కోసం రంగంలోకి దించారని తెలిపింది. అరేబియా సముద్రంలో అనుమానాస్పదంగా కనిపించే పడవలపై కోస్టు గార్డు నిఘా పెట్టినట్లు వెల్లడించింది.
"సోమవారం రాత్రి సమయంలో ఓ పడవ భారత జలాల్లోకి ప్రవేశిస్తున్నట్లు కనిపించింది. ఓఖా తీరానికి 340 కిలోమీటర్ల దూరంలో ఈ ఘటన జరిగింది. భారత్ వైపు వస్తున్న వారిని అడ్డుకునేందుకు కోస్టు గార్డు పడవలు ప్రయత్నించాయి. కానీ, వారు తప్పించుకునేలా ప్రవర్తించారు. పడవను కోస్టు గార్డు బోట్ల నుంచి దూరంగా పోనిచ్చారు. వారిని కోస్టు గార్డు వెంబడించింది. విజయవంతంగా వారిని అడ్డుకుంది. ఆ పడవ ఇరాన్కు చెందినదని తేలింది. ఐదుగురు ఇరాన్ జాతీయులు అందులో ఉన్నారు. కోస్టు గార్డు పడవలో ఉన్న అధికారులు.. ఇరాన్ బోటును తనిఖీ చేయగా 61 కేజీల మాదకద్రవ్యాలు బయటపడ్డాయి. వాటి విలువ రూ.425 కోట్లు ఉంటుందని తేలింది. పడవను, అందులోని సిబ్బందిని అదుపులోకి తీసుకున్నాం. వారిని తీరానికి తీసుకొచ్చాం. తదుపరి విచారణ జరుగుతోంది."
-రక్షణ శాఖ ప్రకటన
నీటి కుంటలో 40కేజీల గోల్డ్
మరోవైపు, సరిహద్దు భద్రతా దళం (బీఎస్ఎఫ్) బంగాల్లోని నదియా జిల్లాలో రూ.2.57 కోట్లు విలువ చేసే బంగారాన్ని స్వాధీనం చేసుకుంది. 40 బంగారం బిస్కెట్లు ఓ నీటి కుంటలో లభ్యమయ్యాయని తెలిపింది. తమకు అందిన పక్కా సమాచారంతో వీటి కోసం వెతికినట్లు పేర్కొంది. కల్యాణీ సరిహద్దు అవుట్పోస్ట్కు సమీపంలోని కుంటలో ఇవి కనిపించాయని వెల్లడించింది. కొద్ది నెలల క్రితం ఓ స్మగ్లర్ వీటిని అందులో దాచిపెట్టాడని బీఎస్ఎఫ్ తెలిపింది. 'కొద్ది నెలల క్రితం ఓ స్మగ్లర్ను అరెస్టు చేశాం. అప్పుడు అతడి వద్ద ఎలాంటి బంగారం దొరకలేదు. అనంతరం అతడిని విడుదల చేశాం. ఆ వ్యక్తే బంగారాన్ని ఇక్కడ దాచిపెట్టాడు. వాటిని తీసుకెళ్లడానికి సరైన సమయం కోసం ఎదురుచూస్తున్నాడు' అని బీఎస్ఎఫ్ వెల్లడించింది.
ఆక్సిజన్ కాన్సంట్రేటర్లో బంగారం
కెన్యాకు చెందిన ప్యాసింజర్.. బంగారం అక్రమ రవాణా చేస్తూ దిల్లీ విమానాశ్రయంలో తమకు చిక్కినట్లు కస్టమ్స్ అధికారులు వెల్లడించారు. ఆక్సిజన్ కాన్సెంట్రేటర్లో ఏడు కేజీల బంగారాన్ని ప్యాసింజర్ అక్రమ రవాణా చేస్తున్నట్లు తెలిపారు. ప్యాసింజర్.. నైరోబీ నుంచి మార్చి 6న దిల్లీలో దిగినట్లు వెల్లడించారు. అనారోగ్యంతో ఉన్న నాలుగు నెలల శిశువుకు ఆక్సిజన్ అందించేందుకు పోర్టబుల్ కాన్సెంట్రేటర్లను ప్రాసింజర్ తీసుకెళ్తున్నట్లు తెలిపారు. శిశువు ఆరోగ్యాన్ని దృష్టిలో పెట్టుకొని అన్ని జాగ్రత్తలతో తనిఖీలు చేపట్టినట్లు చెప్పారు. ప్యాసింజర్ను అరెస్ట్ చేసి దర్యాప్తు చేస్తున్నట్లు వెల్లడించారు.
