'నేపాల్ ఆర్మీ జనరల్​'గా నరవాణే!

సరిహద్దుల్లో శాంతి భద్రతల పరిరక్షణ సహా పలు కీలక ద్వైపాక్షిక అంశాలు చర్చించటానికి భారత సైన్యాధిపతి జనరల్​ ఎం.ఎం నరవాణే నేడు నేపాల్ చేరుకోనున్నారు. నేటి నుంచి మూడు రోజుల పాటు ఆయన పర్యటన సాగనుంది.

భారత ఆర్మీ చీఫ్ జనరల్ మనోజ్ ముకుంద్ నరవాణే నేటి నుంచి మూడు రోజుల పాటు నేపాల్‌లో పర్యటించనున్నారు. రక్షణ, భద్రతా అంశాలపై అక్కడి ఆర్మీ ఉన్నతాధికారులతో కీలక చర్చలు జరపనున్నారు. నేపాల్​ ప్రధాని కేపీ శర్మ, రక్షణ మంత్రి ఈశ్వర్​ పోఖ్రెల్​, ఆర్మీ చీఫ్​ పూర్ణ చంద్ర థాపాలతో నరవాణే భేటీ కానున్నారు.

ఈ పర్యటనలో నేపాల్​ ప్రధానిని కలుస్తున్నాను. ఇరుదేశాల మధ్య రక్షణ, భద్రత, ద్వైపాక్షిక అంశాలకు సంబంధించి చర్చలు జరగనున్నాయి. ఆ దేశ అధ్యక్షురాలు నుంచి గౌరవ 'జనరల్ ఆఫ్ ది నేపాల్ ఆర్మీ' ర్యాంకు తీసుకొబోతుండడం ఆనందంగా ఉంది.

- జనరల్​ ఎం.ఎం నరవాణే, భారత ఆర్మీ చీఫ్

పర్యటన సాగనుందిలా....

నేటి నుంచి ప్రారంభంకానున్న ఈ పర్యటనలో భారత-నేపాల్​ మధ్య సత్సంబంధాల పునరుద్ధరణకు చర్చలు జరగనున్నాయి. 1950లో ప్రారంభమైన పురాతన సంప్రదాయాన్ని కొనసాగిస్తూ.. జనరల్​ నరవాణేకు నేపాల్​ అధ్యక్షురాలు బిద్యా దేవి భండారి 'జనరల్ ఆఫ్ ది నేపాల్ ఆర్మీ' గౌరవ ర్యాంకును ప్రదానం చేస్తారు. ఈ కార్యక్రమం కాఠ్మాండులో జరగనుంది. భారత్ కూడా 'జనరల్ ఆఫ్ ఇండియన్ ఆర్మీ' గౌరవ ర్యాంకును నేపాల్ ఆర్మీ చీఫ్‌కు ప్రదానం చేస్తుంది.

నేపాల్​ కొత్త మ్యాప్​​ తర్వాత తొలిసారి పర్యటన...

ఇటీవల నేపాల్​ ప్రకటించిన కొత్త మ్యాప్​ విషయంలో ఇరుదేశాలకు మధ్య వివాదాలు నెలకొన్నాయి. ఇరువురికీ దాదాపు 1800 కి.మీ మేర సరహద్దు ఉంది. భారత్​లోని లిపులేఖ్, కాలపానీ సహా లింపియాధురా ప్రాంతాలను తమవిగా పేర్కొంటూ నేపాల్​ కొత్త మ్యాప్​ను విడుదల చేశాక.. ఇరుదేశాల మధ్య జరుగుతున్న తొలి అత్యున్నత స్థాయి సమావేశం ఇదే.

పర్యటన ప్రత్యేకమే...

సరిహద్దుల్లో ఒత్తిడి పెంచుతున్న చైనా.. భారత సరిహద్దు దేశాలను తమ వైపు తిప్పుకొని మరిన్ని ఇబ్బందులు సృష్టించాలని ప్రయత్నిస్తోంది. ఇప్పటికే పాకిస్థాన్​తో కలిసి రెండు వైపుల నుంచి దాడి చేస్తున్న చైనా.. నేపాల్​లోనూ కాలుమోపి త్రిముఖ దాడి చేయాలని వ్యూహాలు రచిస్తోంది. ఇందులో భాగంగా ఇటీవల ఈ హిమాలయ దేశంలో పలు ప్రాంతాలను చైనా ఆక్రమించుకునే ప్రయత్నాలు ప్రారంభించింది. వాటిపై నేపాల్​ బహిరంగంగానే విమర్శలు చేస్తున్నా చైనా ప్రభుత్వం పట్టించుకోవట్లేదు. అయితే చైనాకు దీటైన ప్రత్యర్థి మనమే కావడం వల్ల.. నేపాల్​కు అండగా ఉండి ఈ విషయంలో ​కీలకంగా వ్యవహరించనుంది భారత్​.

వైద్య సాయం..

కొవిడ్​ మహమ్మారి నేపథ్యంలో నేపాల్​కు వైద్యపరమైన సాయం చేయాలని భారత్​ నిర్ణయించింది. పలు వైద్య పరికరాలతో పాటు , వెంటిలేటర్లను జనరల్ నరవాణే అందజేయనున్నారు. శివపురిలోని కమాండ్ అండ్ స్టాఫ్ కాలేజీలో శిక్షణ పొందుతున్న అధికారులతో ముచ్చటించనున్నారు.