తూర్పు లద్దాఖ్ ప్రాంతంలో నెలకొన్న ప్రతిష్టంభనను తొలగించేందుకు చైనా అంగీకరిస్తే తప్ప.. భారత్ తన బలగాలను ఉపసంహరించుకోదని రక్షణ శాఖ మంత్రి రాజ్నాథ్ సింగ్ శుక్రవారం స్పష్టం చేశారు. ఈ అంశంపై చర్చల ద్వారా ఒక పరిష్కారం లభిస్తుందనే విశ్వాసాన్ని వ్యక్తం చేశారాయన. సరిహద్దుల్లో మౌలిక సదుపాయాలపై చైనా అభ్యంతరం తెలపడాన్ని తప్పు పట్టిన రాజ్నాథ్.. మరింత వేగంగా భారత ప్రాజెక్టులను అభివృద్ధి చేస్తామన్నారు. ఓ మీడియా ఛానల్కు ఇచ్చిన ఇంటర్వ్యూలో ఆయన పలు కీలక విషయాల గురించి మాట్లాడారు.
భారత బలగాల ఉపసంహరణపై మాట్లాడిన రాజ్నాథ్.. మొదట చైనా ఆ ప్రక్రియను ప్రారంభించాలన్నారు. నిర్ణీత గడువులోగా ప్రతిష్టంభనను తొలగించాలనే నియమమేదీ లేదన్న మంత్రి.. చైనాతో చర్చల ప్రక్రియ పురోగతిలో ఉందని తెలిపారు.
ఉన్నతస్థాయి చర్చలు..
జనవరి 19న ఉన్నత స్థాయి చర్చలకు చైనా ప్రతిపాదించిందని రాజ్నాథ్ తెలిపారు. అయితే సమావేశానికి ఒక్క రోజు ముందు సమాచారం అందిందని పేర్కొన్నారు. జనవరి 23 లేదా 24న తేదీలకు రీషెడ్యూల్ చేయమని కోరామన్నారు. భారత్ చర్చలకు ఎల్లప్పుడూ సిద్ధంగా ఉంటుందని ఉద్ఘాటించారు.
నమ్మకాన్నికోల్పోయిన డ్రాగన్..
అరుణాచల్ ప్రదేశ్లో చైనా నిర్మిస్తున్న గ్రమాలపై రక్షణ మంత్రి స్పందించారు. ఆ గ్రామాలు సరిహద్దుల్లో చైనా వైపు నిర్మిస్తున్నవి మాత్రమే అని స్పష్టం చేశారు. అయితే అవి గతంలోనూ ఉన్నాయని తెలిపారు. అయితే స్థానిక ప్రజలు, సైన్యం అవసరాల మేరకు భారత్ సైతం వాస్తవాధీన రేఖ వెంబడి నిర్మాణాలను వేగవంతం చేసిందన్నారు. గత నాలుగు దశాబ్దాల్లో ఎన్నడూ లేనంతగా భారత్-చైనాల మధ్య సంబంధాలు క్షీణించాయన్న విదేశాంగ శాఖ మంత్రి జై శంకర్ వ్యాఖ్యలను సమర్థించిన రాజ్నాథ్.. దిల్లీ నమ్మకాన్ని బీజింగ్ కోల్పోయిందన్నారు.
అవసరమైతే సవరణలు..
వ్యవసాయ చట్టాల విషయంలో నిబంధనలకు అనుగుణంగా ప్రభుత్వం ముందుకెళ్తుందన్నారు. అంశాల వారీగా చర్చలు జరగాలని.. తప్పనిసరైతే చట్టాల్లో సవరణలకు ప్రభుత్వం సిద్ధంగా ఉందన్నారు. చట్టాలను తాత్కాలికంగా వాయిదావేసే అవకాశాన్ని పరిశీలిస్తామని వ్యవసాయ మంత్రి ప్రతిపాదించారని గుర్తుచేశారు.
ఇదీ చదవండి: మమ్మల్ని చంపేందుకు కుట్ర: రైతు నాయకులు
