భారత్లో కొత్తగా నమోదయ్యే కరోనా కేసుల సంఖ్య అంతకుముందు వారంతో పోలిస్తే గత వారం 13 శాతం తగ్గిందని ప్రపంచ ఆరోగ్య సంస్థ వెల్లడించింది. అయితే ప్రపంచవ్యాప్తంగా కొత్త కేసులు ఎక్కువగా నమోదు అవుతున్న దేశాల్లో భారత్ ఇంకా తొలి స్థానంలోనే కొనసాగుతోందని తెలిపింది. గత వారం ప్రపంచవ్యాప్తంగా 48 లక్షల కేసులు, 86 వేల మరణాలు నమోదయ్యాయని పేర్కొంది. అంతకుముందు వారంతో పోలిస్తే మరణాలు 5 శాతం, కొత్త కేసులు 12 శాతం తగ్గుముఖం పట్టాయని వివరించింది. మే16 నాటికి అందిన సమాచారం మేరకు డబ్ల్యూహెచ్ఓ ఈ ప్రకటన చేసింది.
తగ్గని వైరస్ ప్రభావం
భారత్లో గత వారం 23.87 లక్షల కేసులు నమోదైనట్లు డబ్ల్యూహెచ్ఓ తెలిపింది. ఇది ప్రపంచంలోనే అత్యధికం. అంతకుముందు వారం 27.38 కేసులు నమోదయ్యాయి.
మరణాలు కూడా భారత్లోనే అత్యధికంగా నమోదయ్యాయి. వైరస్ కారణంగా గత వారం 27,922 మంది ప్రాణాలు కోల్పోయారు. ఇది అంతకుముందు వారం కన్నా నాలుగు శాతం ఎక్కువ.
అమెరికాలో కొత్తగా నమోదయ్యే కేసులు తగ్గుముఖం పట్టాయి. గత వారం 2.35 లక్షల కేసులు నమోదయ్యాయి. అంతకుముందు వారంతో పోలిస్తే ఈ సంఖ్య 21 శాతం తక్కువ. కరోనా మరణాలు ఇండోనేషియాలో గత వారం 5శాతం తగ్గాయి. కేవలం 1,125 మరణాలే నమోదయ్యాయి.
ఇప్పటివరకు భారత్లో కరోనా బారిన పడిన వారి సంఖ్య 2.4 కోట్లు కాగా.. మృతిచెందిన వారి సంఖ్య 2.70 లక్షలని డబ్ల్యూహెచ్ఓ పేర్కొంది.
ఇదీ చదవండి : కరోనాపై పోరులో అమరులైన 700 మంది టీచర్లు!
