సూపర్ టేస్టీ 'బెండకాయ మజ్జిగ పులుసు'- ఇలా చేస్తే చుక్క మిగలకుండా జుర్రేస్తారు!

-బెండకాయ జిగురు లేకుండా చేసుకోవచ్చు -ఈ టిప్స్ పాటిస్తే సూపర్ టేస్ట్ వస్తుందట!

Bendakaya Majjiga Pulusu Recipe: మీరు మజ్జిగ పులుసు చాలా సార్లు చేసుకుని తిని ఉంటారు. కానీ ఎప్పుడైనా.. బెండకాయ మజ్జిగ పులుసు తిన్నారా? చాలా ఈజీగా చేసుకునే ఈ పులుసు.. అన్నంలోకి చాలా సూపర్​గా ఉంటుంది. ఇంకా బెండకాయ జిగురు అంటే పడని వారు కూడా ఎంతో ఇష్టంగా తింటారు. మరి ఇంకెందుకు ఆలస్యం.. ఇందులోకి కావాల్సిన పదార్థాలు, తయారీ విధానం ఎలాగో ఇప్పుడు తెలుసుకుందాం.

కావాల్సిన పదార్ధాలు

• 200 గ్రాముల బెండకాయ ముక్కలు
• అర లీటర్ చిలికిన పెరుగు

కొబ్బరి పేస్టు కోసం కావాల్సిన పదార్థాలు

• 2 టేబుల్ స్పూన్ల పచ్చి శనగపప్పు
• 2 టీ స్పూన్ల బియ్యం
• 1 టేబుల్ స్పూన్ ధనియాలు
• పావు కప్పు పచ్చి కొబ్బరి ముక్కలు
• 1 టీ స్పూన్ జీలకర్ర
• 2 పచ్చిమిర్చి ముక్కలు

మజ్జిగ పులుసు కోసం కావాల్సిన పదార్థాలు

• పావు కప్పు నూనె
• 1 టీ స్పూన్ ఆవాలు
• 2 ఎండు మిరపకాయలు
• 2 పచ్చి మిరపకాయలు
• 1 టేబుల్ స్పూన్ అల్లం తరుగు
• అర టీ స్పూన్ పసుపు
• 2 రెబ్బల కరివేపాకు
• 2 చిటికెల ఇంగువా
• రుచి సరిపడా ఉప్పు
• 2 టేబుల్ స్పూన్ల కొత్తిమీర తరుగు

తయారీ విధానం

• ముందుగా శనగపప్పు, బియ్యం శుభ్రంగా కడిగి సుమారు గంట పాటు నానబెట్టుకోవాలి.
• ఆ తర్వాత మిక్సీలో నానబెట్టిన శనగపప్పు, బియ్యం, పచ్చి కొబ్బరి, పచ్చిమిర్చి, ధనియాలు, జీలకర్ర, కొన్ని నీళ్లు పోసి మెత్తగా గ్రైండ్ చేసుకోవాలి.
• మరోవైపు స్టౌ ఆన్ చేసి కడాయిలో నూనె వేడి చేసి బెండకాయ ముక్కలు, కొద్దిగా ఉప్పు వేసి కలిపి మూత పెట్టి హై ఫ్లేమ్ మీద ఎర్రగా వేపి పక్కకు పెట్టుకోవాలి. (మధ్య మధ్యలో కలుపుకోకపోతే బెండకాయలు అడుగు అంటతాయి)
• ఆ తర్వాత అదే గిన్నెలో ఇంకాస్త నూనె వేడి చేసి ఆవాలు, పచ్చిమిర్చి, ఎండుమిర్చి, జీలకర్ర వేసి ఎర్రగా వేయించుకోవాలి.
• అందులోనే అల్లం, పసుపు, కరివేపాకు, ఇంగువా వేసి వేయించుకోవాలి.
• ఇవన్నీ వేగాక మెత్తగా రుబ్బుకున్న శనగపప్పు -కొబ్బరి పేస్టు వేసి కొంత పక్కకు పెట్టుకోవాలి.
• ఆ తర్వాత ఇందులోనే అర కప్పు నీళ్లు పోసి గడ్డలు లేకుండా బాగా కలిపి మీడియం ఫ్లేమ్ మీద ఉడికించుకోవాలి.
• మరోవైపు చిలికిన పెరుగులో మిగిలిన శనగపప్పు పేస్ట్ వేసి బాగా కలిపి ఇందులో పోసుకోవాలి.
• ఆ తర్వాత అర లీటర్ నీళ్లు, ఉప్పు వేసి మీడియం ఫ్లేమ్ పెట్టుకుని​ గడ్డలు లేకుండా కలపాలి.
• సుమారు 8 నిమిషాల తర్వాత వేయించుకున్న బెండకాయ ముక్కలు, కొత్తిమీర తరుగు వేసి బాగా కలిపి మూతపెట్టి 3-4 నిమిషాలు ఉడకనిస్తే టేస్టీ బెండకాయ మజ్జిగ పులుసు రెడీ!