Imprisonment To Retired Officers : విధులకు గైర్హాజరైన ఓ హోంగార్డు నుంచి రెండు రోజులకు గాను.. రూ.170 లంచంగా తీసుకున్నారన్న కేసులో ఉత్తర్ప్రదేశ్లోని పీలీభీత్ జిల్లా కోర్టు తీర్పునిచ్చింది. ఈ కేసులో పదవీ విరమణ పొందిన ముగ్గురు వ్యక్తులను దోషులుగా తేల్చింది. వారికి నాలుగేళ్ల జైలు శిక్షతోపాటు రూ.16వేలు జరిమానా విధించింది. అసలేం జరిగిందంటే?
అధికారులు తెలిపిన వివరాల ప్రకారం.. జిల్లాలోని పురన్పుర్ పోలీస్స్టేషన్ పరిధిలో సూరజ్ అనే వ్యక్తి హోంగార్డుగా 2003 సెప్టెంబరు 10వ తేదీన విధుల్లోకి చేరారు. కానీ ఆ రోజు విధులకు హాజరు కాలేదు. ఆ విషయాన్ని మున్షీ రాజారామ్.. హాజరు రిజిస్టర్లో నమోదు చేశారు. సెప్టెంబరు 13వ తేదీన సూరజ్ తిరిగి విధుల్లోకి చేరారు. ఆ విషయాన్ని కూడా మున్సీ రాజారామ్ రిజిస్టర్లో రాశారు.
మస్టర్ రోల్ సిద్ధం చేసే సమయంలో..
అయితే ప్లాటూన్ కమాండర్ చున్నీలాల్.. అదే నెల(2003 సెప్టెంబరు)కు సంబంధించిన మస్టర్ రోల్ను సిద్ధం చేశారు. అందులో సెప్టెంబరు 11వ తేదీన మాత్రమే హోంగార్డు సూరజ్ విధులకు గైర్హాజరైనట్లు చూపించారు. సెప్టెంబరు 10, 12 తేదీల్లో విధుల్లో ఉన్నట్లు చూపించారు. అనంతరం మస్టర్ రోల్ను కంపెనీ కమాండర్ అబ్దుల్ నఫీస్కు పంపించారు.
రెండు రోజులకు రూ.170 లంచం!
చున్నీలాల్ సిద్ధం చేసిన మస్టర్ రోల్ను పరిశీలించిన కంపెనీ కమాండర్ అబ్దుల్ నఫీస్.. దానిపై సంతకం చేసి పురన్పుర్ బ్లాక్ ఆఫీసర్ రోషన్ లాల్కు పంపారు. అయితే అబ్దుల్ నఫీస్.. రెండు రోజులకు గాను సూరజ్ నుంచి రూ.170 లంచంగా అందుకున్నట్లు అప్పట్లో ఆరోపణలు వచ్చాయి. ఈ మొత్తం వ్యవహారంపై పురన్పుర్ పోలీస్స్టేషన్లో కేసు నమోదైంది.
హోంగార్డు మృతి చెందడం వల్ల..
రాష్ట్ర ప్రభుత్వ ఆదేశాల మేరకు నేర పరిశోధన విభాగం (CBCID).. ఈ కేసును దర్యాప్తు చేసింది. పీలీభీత్ కోర్టులో పెండింగ్లో ఉన్న ఈ కేసులో జడ్జి అమిత్ కుమార్ యాదవ్.. శనివారం తీర్పు ఇచ్చారు. సూరజ్, చున్నీలాల్, అబ్దుల్ నఫీస్, రోషన్ లాన్ను దోషులుగా నిర్ధరించి జైలు శిక్షను ఖరారు చేశారు. హోంగార్డు సూరజ్ మృతి చెందడం వల్ల మిగిలిన ముగ్గురికి నాలుగేళ్ల జైలు శిక్ష విధించారు. ఒక్కొక్కరు రూ.16వేలు చొప్పున జరిమానా చెల్లించాలని ఆదేశించారు.
